BAKI, 22 noyabr. TELEQRAF
Suriya ordusu və “Suriya Demokratik Qüvvələri” (SDQ) Raqqa vilayətinin cənub-şərqində gərginliyin dayandırılması barədə razılığa gəlib.
Teleqraf xəbər verir ki, bu barədə Suriya hökumətindən Almaniyanın DPA informasiya agentliyinə bildirilib.
Qeyd edilib ki, son günlər Raqqanın cənub-şərqində yerləşən Məddan qəsəbəsində baş verən gərginlikdən sonra Suriya Müdafiə Nazirliyi ilə SDQ arasında atəşkəs barədə razılıq əldə olunub. Razılaşmaya əsasən, Məddanda qarşılıqlı atəş, artilleriya və digər hücum əməliyyatları dayandırılır.
Bu, son iki gündə təmas xəttində SDQ və Suriya ordusu arasında müxtəlif növ ağır və orta silahlardan istifadə edilən hücumlar, PUA ilə zərbələr və şiddətli toqquşmaların yaşanmasından sonra baş verib. Hadisələr hər iki tərəfdən ölən və yaralananların olmasına səbəb olub.
Mənbələrin sözlərinə görə, Suriya ordusu son hücum zamanı SDQ yaraqlılarının sızaraq nəzarətə götürdüyü mövqeləri geri qaytarıb. Həmin hücum zamanı SDQ iki suriyalı əsgəri öldürüb, 9 nəfəri yaralayıb və öldürülənlərin cəsədlərinə qarşı təhqiredici davranışlar olub.
Son görüşdə SDQ ordunun nəzarətə götürdüyü mövqelərdən geri çəkilməsini tələb etsə də, Suriya ordusu bunu rədd edib.
SDQ hazırda Raqqanın cənub-qərb kəndlərinin böyük hissəsinə nəzarət edir. Bu ərazilər ötən ilin dekabrında Bəşər Əsəd rejiminin devrilməsindən sonra onlara təhvil verilmişdi.
