ain.az, Cebheinfo saytından verilən məlumata əsaslanaraq xəbər yayır.
Noyabrın 22-də sosial şəbəkələrdə Samuxda çobanın bir qoyunu qamçı ilə döyməsini əks etdirən görüntülər yayılıb.
Polis əməkdaşlarının keçirdikləri tədbirlər nəticəsində heyvanla rəhmsiz davranan şəxsin Samux rayon sakini V. Bayramquliyev olduğu müəyyən edilib.
O, saxlanılaraq polis şöbəsinə gətirilib və barəsində qanunamüvafiq tədbirlər görülüb.
Məsələ ilə bağlı “Cebheinfo.az”a açıqlama verən Bakı Şəhər İcra Hakimiyyəti başçısının tabeliyində fəaliyyət göstərən “Sahibsiz Heyvanlara Qayğı Mərkəzi”nin İdarə Heyətinin sədri Heyran Hüseynova bildirib ki, heyvanlara qarşı bu cür davranışlar qəbuledilməzdir:
“Biz hər zaman çalışmışıq ki, insanlar ilə heyvanlar arasında mərhəmət körpüsü yaradaq. İnsanlar dilsız-ağızsız, danışmayan dostlarımızın problemlərinə biganə qalmasınlar.
Onlara bir qab su, bir qab yem versinlər. Təbii ki, bunu sadəcə istəmirik, həm də bu istiqamətdə maarifləndirmə proseslərini daim davam etdiririk. Əsas məqsədimiz insanların heyvanlara qarşı daha həssas və məsuliyyətli davranmasını təmin etməkdir.
Çünki heyvanlar yaşadığı insan cəmiyyətinin əksidir. Onların vəziyyəti cəmiyyətin insanlıq səviyyəsinin göstəricisidir. Əlbəttə, cərimə mütləq olmalıdır, hətta daha da sərləşdirilməlidir. Çünki cərimələr tətbiq edildikcə insanlar heyvanlara qarşı davranışlarında daha ehtiyatlı olurlar”.
Əfsanə Rəcəb
“Cebheinfo.az”
Problemlərinizi bizə yazın, şahidi olduğunuz hadisələri çəkib göndərin
Ən son yeniliklər və məlumatlar üçün ain.az saytını izləyin, biz hadisənin gedişatını izləyirik və ən aktual məlumatları təqdim edirik.
