Sherg.az saytından verilən məlumata görə, ain.az xəbər verir.
Cənubi Qafqazda yaranmış yeni siyasi reallıqlar fonunda paraflanmış sülh layihəsinin dayanıqlılığı üçün ictimai dəstək vacibdir. Bu dəstəyin formalaşmasının əsas yollarından biri isə vətəndaş diplomatiyasının gücləndirilməsi, qarşılıqlı səfərlərin həyata keçirilməsidir. Noyabrın 21-22-də Bakıya səfər edən Ermənistan vətəndaş cəmiyyəti nümayəndəsi Samvel Meliksetyan qeyd edib ki, “qan tökülməsinin qarşısını almaq üçün qarşılıqlı səfərlər davam etməlidir”. Onun sözlərinə görə, bu təşəbbüsləri “xəyanət” kimi təqdim etmək yanlışdır, çünki məqsəd məhz yeni münaqişələrin qarşısını almaqdır. Erməni ekspert həmçinin Qərbi Azərbaycandan olan soydaşlarımızla bağlı məsələyə toxunaraq qeyd edib ki, “Bakıdakı təmaslar zamanı anladıq ki, orada vaxtilə Ermənistanda (Qərbi Azərbaycan) yaşamış və indi bura üçün həsrət çəkən çoxlu insanlar var”.
Bununla yanaşı, sülhə gedən yolda tarixi yaddaşın qorunması da mühüm əhəmiyyət kəsb edir.
Millət vəkili Hikmət Babaoğlu Sherg.az-a açıqlamasında hazırki mərhələdə Ermənistan və Azərbaycan arasında paraflanmış sülh layihəsinə uyğun olaraq ictimai rəyin bu layihədə bəyan edilən müddəaları dəstəkləməsinə ehtiyac olduğunu söyləyib:
"Bu siyasi diplomatiyanı ictimai platformaya transfer etməkdən keçir. Ona görə də əvvəlcə azərbaycanlı ekspertlərin İrəvana, sonra isə erməni ekspertlərin Bakıya səfərləri baş tutdu. Bu gün Azərbaycan Ermənistana öz şərtlərini qəbul etdirməyi bacarıb. Sülhün olması üçün hüquqi-siyasi və hərbi-siyasi zəmin yaradılıb. Belə olan halda əlbəttə ki, hüquqi-siyasi aktları dəstəkləyən ictimai rəydən dəstək alınmasına ehtiyac var. İctimai rəy isə məhz vətəndaş diplomatiyası vasitəsilə formalaşır. Ona görə də bu cür addımların atılması hazırki mərhələdə həm aktualdır, həm də sülh üçün xeyirli bir addım hesab oluna bilər. Dünya tarixində yüz illərlə müharibə edən xalqlar olub. Amma nəticədə, əgər milli maraqlara uyğundursa, həmin şərtlər daxilində sülhə də hazır olmaq lazımdır".
Deputat hazırki şərtlər daxilində sülhün əldə olunmasının Azərbaycanın da milli maraqlarına uyğun olduğunu vurğulayıb:
"Bu işdə müxtəlif qeyri-hökumət təşkilatlarının, ekspertlərin, vətəndaş cəmiyyəti institutlarının atdığı addımlar da məqbul hesab edilməlidir. Amma, biz bu prosesdə həm də tarixi yaddaşımızı və münaqişə tarixini unutmamalıyıq. Sülhə qədər gələn yolun nələrdən keçdiyini hafizəmizin bir küncündə daim canlı saxlamalıyıq".
Ən son yeniliklər və məlumatlar üçün ain.az saytını izləyin, biz hadisənin gedişatını izləyirik və ən aktual məlumatları təqdim edirik.
