BAKI, 26 noyabr. TELEQRAF
“Yeni Müsavat" media qrupunun rəhbəri Rauf Arifoğlu Teleqraf-ın suallarını cavablandırıb.
Onunla müsahibəni təqdim edirik:
- Rauf bəy, Prezident Administrasiyasının sabiq rəhbəri Ramiz Mehdiyev barəsində həbs qərarı verildikdən sonra əks cəbhədə görünən Azərbaycan Xalq Cəbhəsi Partiyasının (AXCP) sədri Əli Kərimlinin reaksiyaları daha çox diqqəti cəlb edir. Bu nə ilə bağlıdır, partiya sədrinin Mehdiyevin həbsinə bu qədər həssas yanaşmasının səbəbi nədir?
- Bizim Əli Kərimli ilə uzun münasibətlər hekayəmiz var. Bir müddət dalaşmışıq, sonra barışmışıq, daha sonra yenə savaşmışıq. Bunun ardınca bir mərhələdə, 2010-2013-cü illər arasında daha yaxın münasibətlərimiz olub. Ona görə də Əli Kərimli haqqında deyiləcək sözlərim, məlumatlarım çoxdur. Əli Kərimli o şəxslərdəndir ki, özünün hakimiyyətə gəlməsi üçün hər kəslə, hətta şeytanla da müttəfiqlik edər. Amma özümə 2013-cü ilə qədər deyirdim ki, bu adam vətənə xəyanətə getməz. Çünki bir nöqtə, qırmızı xətt var ki, orada durar. Lakin, 2013-cü ildə yaradılan “Milli Şura” modelində açıq-aydın şəkildə göründü ki, o və yerdə qalan, onun ətrafında birləşən müxalif kəsim Rusiya ilə açıq şəkildə “ittifaqa” getdilər. Bu prosesin əlifbasına qədər içərisində, yanında olmuşam. Ona görə də “Milli Şuraya” daxil olmaqdan imtina etmişəm. Çünki mən vətənə xəyanət layihəsində yer ala bilməzdim.
- O vaxt belə bir “təşkilatın” yaradılmasında əsas məqsəd nə idi?
- Əsas məqsəd Rusiya vasitəsi ilə Azərbaycanda hakimiyyəti devirmək, Ramiz Mehdiyev və Abbas Abbasov (Abbas Abbas baş nazirin sabiq müavini) “koalisiyası” ilə birləşərək iki illik keçid hökuməti yaratmaq olub. Bu günlərdə Mehdiyevin üzə çıxan və Rusiyaya ünvanlandığı məktub əslində 2013-cü ildəki ilə bu və ya başqa şəkildə təkrarI hesab oluna bilər. Çünki burada təkrar tezislər var. Bu məqamlar mənim 2019-cu ildə verdiyim müsahibədə də yer alıb.
- Belə çıxır ki, bir müddət öncəyə qədər daha gərgin olan Azərbaycan-Rusiya münasibətləri həm də fərqli rakurslarda izah oluna bilər?
- Yəni, bu gün Azərbaycan-Rusiya gərginliyi fonunda mütləq ki, 2013-cü il “modeli” yada salınmalıdır. Başqa bir paytaxtda qurulan qurum yəni, “Milli Şura” Bakıya gətirildi və burada Azərbaycan siyasətinə peyvənd edildi. Bu Azərbaycan tarixində yaşanan bir ilk idi. O zamandan qurulan münasibətlər yer altında, gizli şəkildə davam etməyə başladı. Nəticədə, gizli bir “ittifaq” quruldu. Bu ittifaqın nəticəsidir ki, bu gün də Əli Kərimli və onun "trol ordusu”, o cümlədən onlara bağlı xaricdəki media quruluşları Mehdiyev mövzusuna həssas yanaşırlar.
- Bu həssaslıq daha çox özünü necə gəstərdi?
- Ramiz Mehdiyevdən danışan, onu ifşa edən, onun əməllərini yada salan Milli Məclisin deputatları şantaj olundu. Onların bir neçəsi artıq demək olar ki, susub. Çünki bu adamlar ailələri və başqa məsələlərlə şantajla üzləşdilər. Onlardan danışan media quruluşları Bakıda və xaricdə olan sosial media kanalları ilə hədəfə gətirildi, təhqir, təhdid edildi, şantaj olundu. Sözsüz ki, bu da o bağlılığı göstərir. Mehdiyev “klanı” Əli Kərimlinin çevrəsinə qədər uzanan bir əlaqələrə malikdir. Görünən odur ki, 2013-cü ildə qurulan “ittifaq” müəyyən zərbə alsa da, keçici olaraq fəaliyyətini dondursa da, hələ də davam edir.
- Sizcə, Mehdiyev “klanı”na kimlər daxil idi?
- Söhbət Mehdiyev və onun ətrafında olan bir neçə qohum-qardaşdan deyil, “medhiyevşinadan”, Mehdiyev “klanından” gedir. Mənim məlumatıma, düşüncələrimə görə, bu “klanın” müəyyən nöqtləri bu gün müxalifətdə, parlamentdə, o cümlədən xarici ölkələrə qədər uzanan xətlər, vektorlarda da var. Ramiz Mehdiyev xəttinə Abbas Abbasov və keçmiş yüksək səviyyəli məmurların bir neçəsi daxildir. Onlar hələ vəzifədə olarkən 2017, 2018, 2019-cu illərdə başa düşürdülər ki, Prezident İlham Əliyevin islahatlarında, gələcək kateqoriyasında onlara yer yoxdur. Ona görə də sabotaja başlamışdılar.
- O vaxt mövcud hakimiyyətə qarşı siz dediyiniz sabotajlar özünü daha çox hansı müstəvidə göstərirdi?
- Onlar daha çox küçə riçaqları ilə AXCP və digər qurumları meydanlara, küçələrə çıxartmağa çalışırdılar, buna təhrik edirdilər. 2019-cu ilin yanvar ayında başlayan küçə prosesləri məhz bu təhrikin nəticəsi idi.
- Bununla nəyə nail olmaq istəyirdilər?
- Bunun bir neçə səbəbi var idi. Birinci səbəb o idi ki, öz əhəmiyyətlərini, lazımlılıq dərəcəsini göstərsinlər və yada salsınlar. İkincisi isə, Prezident İlham Əliyev başda olmaqla hakimiyyətə, islahatçı komandaya problem yaratsınlar ki, “siz islahata başlasanız, biz kənarda qalsaq, Əli Kərimli və bütün müxalifət sizin üstünüzə gələcək, təhdid yaradacaq. Biz çox önəmliyik, vacibik. Bunun da qarşısını ancaq biz ala bilərik”. Yəni, problem yaradıb sonra da o problemi özlərinin vasitəsi ilə həll etmək modelini ortaya atmışdılar. Bu baxımdan onlar arasında qurulan münasibətlər bu gün də demək olar ki, özünün ən kritik nöqtəsinə çatmaqdadır.
- Bu gizlin plan nə vaxt ifşa olundu?
- İndi Mehdiyev və onun Azərbaycanla bağlı planları 12 il sonra yenidən “Milli Şura” modelində, keçid hakimiyyəti yaratmaqla, prezident üsul- idarəsini ləğv etməklə, Prezident İlham Əliyevi devirmək iddiaları ilə ortada, gündəmdədir. Mehdiyevin bəlli olan “50 nəfərlik” keçid qurumunda heç şübhəsiz ki, Əli Kərimlinin, müxalifətin bir sıra təmsilçilərinin adları var. Çünki bu iş birliyi uzun illərdir ki, mövcuddur.
- Necə olur ki, bunlar indi ortaya çıxır?
- Bütün bunların sxemini 2019-cu ilin əvvəllərində müsahibə kimi vermişəm. “Azloqosda” mənim bununla bağlı müsahibəm var. Orada açıq şəkildə 2019-cu ildə “Yeni Müsavat” qəzetinin 30 illiyi münasibəti ilə sentyabr ayındakı müsahibəmdə bu məqamlar öz əksini tapıb. O proseslərin içərisində müxalifətin liderlərindən biri də mən olduğum üçün bu xəyanəti görərək kənara çəkilib, bunların hamısını rahat şəkildə vaxtında, doğru-dürüst söyləyə bilmişəm.
- “Mehdiyev klanına” daxil olan şəbəkənin ifşa prosesinin başa çatdığını söyləmək olarmı?
- Ramiz Mehdiyev tam şəkildə ifşa olundu. Artıq onun xəyanət əməli, “kadrosu” ortadadır. Bu “kadroya” Əli Kərimli və onun çevrəsi, “Milli Şura” da daxildir. Təəssüf ki, bu prosesin ifşa olunması, cəzalandırılmaması 12 il uzandı. Artıq bu təhdid aradan qalxıb, hər şey dövlətin, istintaqın əlindədir. Bu “dəstənin” başında olan Ramiz Mehdiyevlə bağlı məhkəmənin qərarı ilə ev dustaqlığı qərarı verilib. Cinayət işi, məndə olan məlumata görə, gedir. 12 il öncə və bəlkə də ondan əvvəl qurulmuş “ittifaq” bu gün ifşa olunmuş vəziyyətdədir. Əminik ki, istintaq bu əlaqələrin şaxəsini tapacaq, ortaya çıxaracaq və onu təsirsizləşdirəcək.
- Bu proses çərçivəsində kimlərinsə həbsinə dair iddialar səslənir…
- Mən də əminəm ki, yaxın zamanlarda bu mövzuya dair həbslər gözlənilir. Hər kəs də xəyanət “kadrosunun” həbsinə hazır olsun. Burada çox təəccüblü simaların da olacağı da mümkündür.
- Sizcə kimlər bu proses çərçivəsində istintaqa cəlb edilə bilər?
- İstintaqdan əvvəl ad çəkmək istəmirəm, bu prosesə mane ola bilər. Kimlərinsə ölkədən çıxışına, qaçısına imkan yaranar. Amma Mehdiyev Azərbaycan siyasətində dərin “köklərə” malik bir sistem qurub. Bu sistemdə hazırda fəaliyyətdə olan parlament platformasında, keçmiş yüksək vəzifəli məmurlar, konstitusiyaya görə dövlət nizamında vəzifə tutmuş məmurları yer alıb və almaqdadır. Müxalifət və mediada da bunlar var. Bunlar qarışıq bir şəbəkədir. 2012-2013-cü illərdə bu şəbəkə, “klan” Azərbaycanda hakimiyyət çevrilişi etməyə cəhd göstərib. Sözsüz ki, bunlar Rusiyanın təşəbbüsü ilə olub. Moskvada kənar bir paytaxtda qurulmuş “Milli Şura” modeli vasitəsi ilə bunu etməyə çalışıblar.
- Azərbaycanla Ermənistan arasında hazırkı sülh prosesinə bu qüvvələrin təsir imkanları olubmu və son zamanlar Bakıda və İrəvanda “5-ci kolon”a qarşı olan proseslər arasında sinxronluq varmı?
- Heç şübhəsiz ki, bunlar arasında bir sintez olub. Əgər 2013-cü ildə onların planları baş tutsaydı, eləcə də Rusiyadan Azərbaycana peyvənd olunmuş “Milli Şura” Ramiz Mehdiyev, Abbas Abbasov və digər şəxslərlə birləşərək Azərbaycanda hakimiyyəti götürə bilsəydilər bu Azərbaycan torpaqlarında ikinci erməni dövlətinin tanınmasına gətirib çıxaracaqdı. “Plan” bundan ibarət idi. “Artsax” adında Azərbaycan ərazisində ikinci erməni dövləti qurulacaqdı. İndiki də məhz eyni “mərkəzli”, “ideyalı” bir prosesdir. Burada da məqsəd sülh prosesini pozmaq Ermənistanla Azərbaycan arasında yenidən gərginlik yaratmaq, bununla da Rusiyaya, yəni bir orbitr dövlətə ehtiyac yaratmaq niyyətləri vardı. Azərbaycana və Ermənistana, ümumiyyətlə Cənubi Qafqaza Rusiyanın nəzarətini geri qaytarmaq istəyirdilər. Biri var bir qrup hakimiyyətə gəlmək üçün bunu həyata keçirsin, bir də var ki, Azərbaycana xəyanət və onun torpaqları hesabına ikinci erməni dövlətinin qurulması… İndi isə Azərbaycana təzyiq vasitəsi ilə ölkədə hakimiyyət dəyişikliyini həyata keçirib sülh prosesini pozmağa çalışırdılar. Eyni xətt, eyni proses Ermənistanda da gedir. Sadəcə olaraq, Azərbaycan dövləti “5-ci kolon”u ifşa etdi. Artıq bu qüvvələrin tam təsirsizləşdirildiyini söyləyə bilərik.
