Bu gün dünya ölkələri Şükran Gününü qeyd edirlər. Bayram ənənəsi əsasən ABŞ və Kanadada qeyd olunaraq, zaman keçdikcə dünyanın müxtəlif bölgələrində yayılmağa başladı. Bu günün mahiyyəti insanların sahib olduqları nemətlərə, ailələrinə, bərəkətə və birlik hissinə görə minnətdarlıq bildirməsinə əsaslanır.
Missiya.Az Avropanın ənənəsi halına gələn Şükran Gününün tarixi ilə bağlı araşdırma edib.
Bayramın tarixi XVII əsrə dayanır: 1621-ci ildə ağır qışdan sonra ilk uğurlu məhsul mövsümünü yaşayan ingilis kolonistləri yerli Wampanoag tayfası ilə birlikdə böyük bir ziyafət təşkil etmiş və bu hadisə sonradan Şükran Gününün başlanğıcı kimi qəbul edilmişdir. XIX əsrdə ABŞ Prezidenti Abraham Lincoln bu ənənəni rəsmi bayrama çevirərək xalqa ümid və birlik mesajı vermək istəmişdir.Bu gün Şükran Günü əsasən ABŞ və Kanadada dövlət səviyyəsində qeyd olunur, lakin Avropa, Latın Amerikası, Avstraliya və Asiyanın müxtəlif ölkələrində yaşayan amerikalı icmalar arasında da qeyd edilməyə davam edir. Azərbaycanda isə Şükran Günü rəsmi bayram deyil və milli kulturanın bir hissəsi sayılmır. Lakin son illərdə Amerika mədəniyyətinə marağı olan bəzi insanlar, xüsusilə xaricdə yaşayan və ya Amerika təhsili almış şəxslər ailə və dost çevrələrində kiçik toplantılarla bu günü simvolik şəkildə qeyd edirlər. Buna görə də Azərbaycanda bu ənənə geniş yayılmasa da, müəyyən qruplar arasında tanınmağa başlayıb.
Bayramın ən məşhur simvolu olan hind quşu isə bolluq və bərəkət rəmzi kimi qəbul edilir. Tarixi səbəblərə görə hindinin bu bayramla əlaqəsi olduqca güclüdür: həm ilk kolonistlərin əsas ov heyvanlarından biri olması, həm də böyük ailəni doyurmağa yetəcək qədər iri olması onu paylaşma, birlik və kifayətlilik simvoluna çevirmişdir. Şükran süfrəsində hindinin bölünməsi ailə bağlarının güclənməsini və insanların bir-birinə olan bağlılığını təcəssüm etdirir.Müasir dövrdə Şükran Günü sadəcə bir mətbəx və ənənə bayramı deyil, eyni zamanda insanların öz həyatlarına nəzər salıb nələrə görə minnətdar olduğunu düşündükləri emosional və sosial bir hadisədir. Ailələrin bir araya gəlməsi, sevgi və birlik hissinin güclənməsi, paylaşma mədəniyyətinin önə çıxması bu günün əsas mahiyyətini təşkil edir. Bu bayram həm də insanlara yaxşılığa fokuslanmağı, həyatda olan gözəllikləri görməyi və dəyərləndirməyi xatırladan xüsusi bir gündür.
İlahə QənbərliMissiya.Az
