Bakı, 27 noyabr, Günel Türksoy, AZƏRTAC
2024-cü ildə Bakıda keçirilən VI Ümumdünya Mədəniyyətlərarası Dialoq Forumu böyük əhəmiyyət daşıyır. “Bakı Prosesi” çərçivəsində reallaşan bu Forum fərqli etnik, mədəni, dini və dil mənsubiyyətinə malik insanları bir araya gətirərək qlobal mədəniyyətlərarası dialoqun inkişafına mühüm töhfə verib. Tədbir həm regionda, həm də dünyada yeni təşəbbüslərin yaranmasına və əməkdaşlığın güclənməsinə şərait yaradıb.
Bunu AZƏRTAC-a məxsusi müsahibəsində filologiya üzrə fəlsəfə doktoru, Rumıniyanın Yassi şəhərində “Alexandru Ioan Kuza” Universitetində “Petru Karaman” Slavistika kafedrasının dosenti, Azərbaycan Multikulturalizm Mərkəzinin rəhbəri Lyudmila Bejenaru deyib.
L.Bejenarunun sözlərinə görə, Azərbaycanın multikulturalizm konsepsiyasında müasir nəsil, xüsusilə gənclər və tələbələr, cəmiyyətin ən fəal və dinamik hissəsini təşkil edir. O qeyd edib ki, hər il minlərlə tələbə təhsil, tədqiqat və mədəniyyət sahələrində Azərbaycan dəyərlərini hörmətlə qoruyur və təşviq edir. Onun fikrincə, Azərbaycan multikulturalizmi məktəbinin formalaşması gənclərdə fəal həyat mövqeyinin, həmçinin ictimai-siyasi və mədəni həyata qoşulmağa hazırlığın yaranmasına mühüm töhfə verir.
Qeyd edək ki, müsahibənin tam variantı tezliklə AZƏRTAC-da yayımlanacaq.
