Paytaxtda bu gün ənənəvi “Qara cümə” endirimləri səbəbilə alış-veriş mərkəzlərində sözün əsl mənasında izdiham yaşanır. Mağazalar açılmamış insanlar qapı önündə növbəyə düzülüb, daha münasib qiymətə məhsul almaq ümidi ilə səhər tezdən ticarət obyektlərinə axışıb.
Musavat.com-un əməkdaşı bir neçə böyük ticarət mərkəzində müşahidələr aparıb, mağazaların daxilində yaranan vəziyyəti lentə alıb.
Gün ərzində paytaxtın demək olar ki, bütün iri geyim mağazalarındə eyni mənzərə qeydə alınıb: mağazaların təqdim etdiyi 30-40 faiz endirimlər insanlar arasında güclü maraq yaradıb. Xüsusilə geyim, ayaqqabı, aksesuar mağazalarında ciddi sıxlıq müşahidə olunub. Alıcılar bəyənilən məhsulu itirməmək üçün tələsik seçim edir, mağaza əməkdaşları isə artan təzyiqə uyğun olaraq məhsul yerləşdirmə və xidmət prosesini sürətləndirməyə çalışırdılar.
Kassa önündə yaranan uzun növbələr isə günün əsas görüntülərindən biri olub. Bəzi məkanlarda təkcə ödəmə üçün 20-30 dəqiqə gözləməli olanlar belə olub. Mağazalara giriş məhdudlaşdırıldığı hallarda alıcıların bir qisminin çöldə yarım saatdan artıq növbə saxladığı da müşahidə edilib.
Sosial şəbəkələrdə paylaşılan görüntülər də “Qara cümə”nin Bakıda artıq alışılmış bir ənənəyə çevrildiyini göstərir. İnsanların bir qismi endirimləri fürsət adlandırsa da, digərləri qiymətlərin əvvəlcə süni şəkildə qaldırılıb sonra endirim adı ilə təqdim edildiyini iddia edir. Buna baxmayaraq, bu gün paytaxtdakı demək olar bütün alış-veriş mərkəzləri böyük insan axını ilə üzləşib və gün ərzində satışların kəskin artdığı bildirilir.
Qara cümə - “Black Friday” anlayışı ilk dəfə ABŞ-da meydana çıxıb. XIX əsrin sonlarından başlayaraq Şükran günündən sonrakı ilk cümə ilboyu ən böyük endirim kampaniyalarının keçirildiyi günə çevrilib. 1960-cı illərdə Filadelfiya polisi həmin gün küçələrdə yaranan nəzarətsiz izdiham və tıxaclara görə bu termini “qara gün” kimi işlətməyə başlayıb. Daha sonra ifadə bütün ölkəyə yayılıb və bu gün qlobal alış-veriş trendinə çevrilib. Hazırda dünyanın onlarla ölkəsində, o cümlədən Azərbaycanda da hər il noyabrın son cüməsi böyük endirim kampaniyaları ilə qeyd olunur.
Şahanə Rəhimli
Musavat.com
