Ər və ya arvaddan birinə məxsus olan avtomobilin digəri tərəfindən etibarnamə olmadan idarə edilməsi məsələsi zaman-zaman gündəmə gəlir. Avtomobil rəsmi qeydiyyata alınan bir mülkdür və onu idarə etmək Yol Hərəkəti haqqında Qanun və İnzibati Xətalar Məcəlləsinə əsasən tənzimlənir.
Yəni əvvəlcə avtomobil rəsmi qeydiyyata alınır, daha sonra isə avtomobili idarə edənlərin konkret dairəsi və onların idarəetmə zamanı məsuliyyətləri müəyyən edilir.
Maraqlıdır, ailə üzvlərinin istifadələrində olan maşınları etibarnaməsiz istifadəsi mümkündürmü? Bunun gələcəkdə ləğvi məqsədəuyğun olarmı?
Mövzu ilə bağlı NOCOMENT.az-a danışan nəqliyyat eksperti Yasin Mustafayev bildirib ki, bəzi hallarda etibarnamələr yol patrul xidmətinin əməkdaşlarına müəyyən qanun pozuntularının qarşısını almağa imkan verir:
“Amma ailə üzvləri üçün etibarnamə tətbiq olunmamalıdır.
Məsələn, bir çox xarici ölkələrdə ümumiyyətlə belə bir etibarnamə anlayışı yoxdur. Əgər kimsə avtomobili icazəsiz götürərsə və ya oğurlayarsa, bu, birbaşa cinayət məsuliyyəti yaradır. Yəni məsələ hüquqi məsuliyyət çərçivəsində həll olunur. Etibar edilməmək məsələsi isə ikinci planda qalır. Bu səbəbdən, bizdə də etibarnamələrin ləğvi ilə bağlı qərar verilməsi daha məqsədəuyğundur”.
