Fərid Həşimov: “Çin istehsalı olan avtomobillərin elektromaqnit şüa yayması ilə bağlı deyilənlər rəsmi təsdiqlənməyib”
Son zamanlar Çin avtomobil sənayesi bütün dünyada öz sözünü deməyi bacarıb. Artıq dünyaca məşhur bir sıra avtomobil firmaları Çin avtomobilləri ilə rəqabətdə uduzurlar. Ölkəmizdə də Çin maşınlarına maraq gün keçdikcə artmaqdadır.
Lakin bu avtomobillərə münasibət heç də birmənalı deyil. Çin istehsalı olan məhsulların “keyfiyyətsizliyi” ilə bağlı insanlarda formalaşmış inamla yanaşı, onların sağlamlıq üçün fəsadlarının olduğu ilə bağlı fikirlər də önə sürülür. Iddia edilir ki, Çin istehsalı avtomobillər uzunmüddətli hərəkət zamanı elektromaqnit şüalar yayaraq insan sağlamlığına mənfi təsir göstərə bilər.
Avtomobil sahəsi üzrə ekspert Yuliya Truşkova bir müddət öncə xarici mediaya açıqlamasında bildirib ki, hibrid və elektrik avtomobillərin akkumulyator və yüksək gərginlikli naqilləri işləyərkən elektromaqnit sahəsi yaranır. Bu, xüsusilə sürətli yükləmə və ya kəskin sürətlənmə zamanı normadan artıq ola bilər: “Normadan artıq şüalanma əsasən invertor yaxınlığında və akkumulyatorun alt hissəsində qeydə alınır. Sanitar normalar davamlı təsir nəzərə alınaraq hazırlanıb, avtomobildə isə radiasiya qısamüddətlidir və sabit deyil. Sürücü adətən radiasiya mənbəyindən 40-60 sm aralıda oturur və kabellər qoruyucu kanallardan keçir. Beynəlxalq araşdırmalar da real şəraitdə hibrid avtomobillərin insan sağlamlığı üçün təhlükəli olmadığını göstərir”.
Maraqlıdır, bu iddialar nə dərəcədə doğrudur?
“Nəqliyyat vasitəsi hərəkətdə olarkən, xüsusilə enerji yığımı və batareya istifadəsi zamanı elektromaqnit sahələr yarana bilər, ancaq…”
Nəqliyyat eksperti Fərid Həşimov "Bakı-Xəbər"ə açıqlamasında bildirdi ki, dünya bazarında rəqabət kəskin olduğundan, uduzan şirkətlər bəzən şər-böhtan kampaniyalarına əl atır: “Rəqabət mühitində uduzan tərəf çox zaman belə iddialar səsləndirir. Çin istehsalı olan avtomobillərin elektromaqnit şüa yayması ilə bağlı deyilənlər də rəsmi təsdiqlənməyib. Texniki testlərdən uğursuz çıxmış hər hansı model yoxdur. Bu nəqliyyat vasitələri daha çox şəhər üçün nəzərdə tutulub, yolsuzluq şəraiti üçün deyil. Əgər elektromaqnit şüa və ya başqa texniki qüsurla bağlı real neqativ hal olsaydı, istehsalçı şirkətlər dərhal geri çağırış elan edərdi. Belə bir proses müşahidə olunmadığı üçün bu iddiaların doğruluğu şübhə altındadır”.
Həmsöhbətimiz onu da əlavə etdi ki, nəqliyyat vasitəsi hərəkətdə olarkən, xüsusilə enerji yığımı və batareya istifadəsi zamanı elektromaqnit sahələr yarana bilər: “Avtomobil hərəkət edərkən batareyalar xüsusi texnologiya ilə enerji toplayır və ehtiyat enerji anbarı kimi istifadə olunur. Bu prosesdə müəyyən elektromaqnit şüalanma baş verə bilər. Ancaq bunun təhlükəli olduğu sübut edilməyib. Ümumiyyətlə, elektromobillər insanların istifadəsinə verilməzdən öncə istər alimlər, istər mühəndislər tərəfindən dəfələrlə yoxlanılır. İnsan səhhətinə, həmçinin təbiətə ziyan olub-olmadığı dəfələrlə araşdırılır və ondan sonra satışa çıxarılır”.
Günel CƏLİLOVA
