Bakı, 28 noyabr, AZƏRTAC
Hava Nəqliyyatında Baş Gömrük İdarəsinin Logistika Mərkəzi Gömrük postunda ölkəyə idxal, ixrac və tranzit daşınan yüklərin gömrük rəsmiləşdirilməsini həyata keçirir.
AZƏRTAC xəbər verir ki, bunu Hava Nəqliyyatında Baş Gömrük İdarəsinin Logistika Mərkəzi Gömrük postunun rəisi Rövşən Mahmudzadə həmin quruma təşkil olunan mediatur çərçivəsində jurnalistlərə açıqlaması zamanı bildirib.
Onun sözlərinə görə, Avtomatlaşdırılmış Risk Analiz Sistemi (ARAS) yüklərin yoxlanışa cəlb olunmasını xüsusi indikatorlar əsasında müəyyən edir.
“Yoxlamalar zamanı yüklərin qanunvericiliyə uyğunluğu araşdırılır. Uyğunluq təsdiqləndikdən sonra yüklər ölkəyə buraxılır, pozuntu halları aşkar edildikdə isə müvafiq tədbirlər görülür. Logistika Mərkəzi Gömrük postunda sutka ərzində orta hesabla 80 ton idxal, 5 ton ixrac və 600 ton tranzit-transfer yükü gömrük rəsmiləşdirilməsindən keçirilir. İdxal, ixrac və tranzit yüklər əsasən hava daşıyıcıları vasitəsilə gətirilir. Daşınan yüklərin əsas istiqamətləri ABŞ, Avropa ölkələri və Birləşmiş Ərəb Əmirlikləridir”, - deyə o qeyd edib.
Hava Nəqliyyatı Baş Gömrük İdarəsinin sərnişin şöbəsinin böyük inspektoru Xatirə Məmmədova isə gömrük orqanlarının gömrük nəzarətini təkmilləşdirilmiş qaydada həyata keçirmək üçün nəqliyyat vasitələrilə ölkəyə daxil olan sərnişinlərə “yaşıl” və “qırmızı” kanaldan keçməsini təmin etdiyini açıqlayıb. O bildirib ki, Azərbaycan Respublikası Nazirlər Kabinetinin 14 oktyabr 2023-cü il tarixli qərarına əsasən gömrük sərhədini keçən şəxslar “yaşıl” və “qırmızı” kanal buraxılış sistemlərindən istifadə edə bilərlər.
““Yaşıl” kanal sərnişinlər tərəfindən ölkəyə gətirdikləri mallar barədə məlumatı gömrük orqanlarına şifahi, “qırmızı” kanal isə gətirilən mallar barədə məlumatı yazılı formada bəyan edilməsi üçün nəzərdə tutulub. Gömrük orqanları qanunvericiliyi riayət olunması üçün “yaşıl” kanaldan istifadə edən şəxsləri gömrük nəzarəti formalarından istifadə etmək məqsədi ilə “qırmızı” kanala yönləndirmək hüququna malikdirlər”, -deyən X.Məmmədova nəzərə çatdırıb ki, burada onlarla söhbət aparılır və əlavə yoxlama və nəzarət işləri həyata keçirilir.
