“Turizm həvəskarı və istehlakçı hüquqlarını qoruyan biri kimi daim ölkənin müxtəlif regionlarına səfər edirəm. Azərbaycanda turizm sahəsində ciddi qiymət artımı var. Biznes qurumlarına yaradılan toxunulmazlıq mühiti onların sui-istifadə hallarını artırıb, qiymətlər həddindən artıq yüksəlib. Yay aylarında bir gecəsi 280 manata olan turizm mərkəzlərində belə yer tapılmır”.
Bu sözləri Demokrat.az-a açıqlamasında Azad İstehlakçılar İctimai Birliyinin sədri Eyyub Hüseynov deyib.
“Bu, tələbatın artdığını göstərir, lakin orta və aşağı gəlirli insanların imkanlarına uyğun istirahət məkanları çox azdır.Məmurlara məxsus turizm obyektlərində vəziyyət daha problemlidir. Onlar vətəndaşlara qarşı daha sərt davranır, bəzi obyektlər həmkarlar ittifaqları ilə müqavilələr bağlayaraq dövlət büdcəsi hesabına turist qəbul edir. Bu isə digər vətəndaşların əlçatanlığını azaldır. Bundan başqa, məmurların təsiri altında olan obyektlərdə adi turizm obyektlərinə basqı reydləri keçirilir. Ailə ilə gələn insanların sənədləri əsassız şəkildə yoxlanır, sənədi olmayan cütlüklər qəbul edilmir. Bu isə qanuna zidd və qeyri normal vəziyyət yaradır”.
Ekspert deyib ki, yay aylarında qiymətlər çox yüksək, xidmət isə aşağı səviyyədə olur:
“Çox sayda xarici ölkədə olmuş biri kimi deyə bilərəm ki, Azərbaycandakı qiymət–xidmət nisbəti ciddi şəkildə uyğunsuzdur. Xidmət zəifdir, qiymətlər isə həddən artıq bahadır.Ölkənin müvafiq qurumları bu sahədə nəzarəti gücləndirməlidir. Xüsusilə dövlət məmurlarına məxsus turizm obyektlərinin digərlərinə qarşı tətbiq etdiyi təzyiqlər dayandırılmalı, bazarda sağlam rəqabət təmin olunmalıdır”.
