Bizimyol saytından əldə olunan məlumata görə, ain.az məlumat yayır.
Son günlər sosial şəbəkələrdə və mediada bahalı Çin istehsalı avtomobillərinin qəfil alışması, elektron sistemlərində ciddi nasazlıqların yaranması, hətta hərəkət zamanı öz-özünə sönməsi ilə bağlı xəbərlər artmaqdadır. Bir neçə ay əvvəl bazarı sürətlə ələ keçirən, haqqında təriflər səngiməyən bu avtomobillər bu gün artıq sual işarələri ilə gündəmdədir.
Çin avtomobillərinin qısa müddətdə geniş yayılmasının başlıca səbəbi həm qiymət baxımından əlçatan olmaları, həm də zəngin funksiyalara malik olmaları idi. Sürücülərə təqdim olunan süni intellekt dəstəyi, geniş multimedia sistemləri, yüksək təhlükəsizlik paketləri və müasir dizayn istehlakçıların böyük hissəsində müsbət təəssürat yaratmışdı. Bir çoxları bu avtomobilləri premium markalara alternativ kimi görməyə başlamışdı. Lakin getdikcə artan real təcrübələr, xüsusən də elektronika ilə bağlı problemlər həmin “tərif buludlarını” dağıtmağa başlayıb.
Digər tərəfdən, yerli servis mərkəzlərinin çatışmazlığı da vəziyyəti ağırlaşdıran faktorlardandır. Avtomobillərin texnoloji baxımdan mürəkkəb olması, diaqnostika üçün xüsusi avadanlıq tələb etməsi sürücüləri çətin duruma salır. Sərfəli qiymətə görə alınan avtomobil daha sonra bahalı və çətin xidmətlə istifadəçiyə ciddi yük yaradır.
Bazarın birdən-birə bu dərəcədə Çin markaları ilə dolması da müəyyən şou-effekt yaratmışdı. Reklamlar, sosial mediada blogerlərin müsbət rəyləri, sərfəli kredit şərtləri, istehsalçıların aqressiv kampaniyaları avtomobili alıcının gözündə “mükəmməl” göstərmişdi. Lakin real istifadə zamanı ortaya çıxan problemlər bir daha sübut edir ki, hər parlayan şey qızıl deyil və avtomobil kimi ciddi bir alışda emosiyalar deyil, uzunmüddətli etibarlılıq ön planda olmalıdır.
Bu hadisələr avtomobil sektorunda bir daha göstərdi ki, təkcə dizayn, opsiya və qiymət deyil, markanın illərlə sübut etdiyi texniki etibar da böyük rol oynayır. Çin avtomobillərinin gələcəkdə bu problemləri aradan qaldıraraq daha etibarlı hala gəlməsi mümkündür, amma hazırkı vəziyyət alıcılar üçün ciddi xəbərdarlıq siqnalıdır. Bazara yeni daxil olan hər brendi diqqətlə araşdırmaq, servis imkanlarını öyrənmək və real istifadəçi təcrübələrini izləmək vacibdir.
Leyla Mirzə, Bizimyol.info
Ən son yeniliklər və məlumatlar üçün ain.az saytını izləyin, biz hadisənin gedişatını izləyirik və ən aktual məlumatları təqdim edirik.
