Ali təhsil müəssisələrinə qəbul imtahanlarının daha şəffaf keçirilməsi üçün yeni yanaşmalar tətbiq edilə bilər.
Bu fikirləri AzEdu.az-ın "TəhsilSİZ" verilişində təhsil tədqiqatçısı Elmin Nuri səsləndirib.
O qeyd edib ki, qəbul prosesi iki mərhələdə təşkil olunarsa, daha effektiv olar:
"Əvvəlcə abituriyentlər Dövlət İmtahan Mərkəzinin mərkəzləşdirilmiş test imtahanında iştirak edir və topladıqları bal əsasında nəticə müəyyənləşir. İkinci mərhələdə isə universitetlər həmin abituriyentləri öz daxili imtahanları ilə qiymətləndirir. Bu model artıq bir neçə universitetdə uğurla tətbiq olunur.
Amma burada bir sual yaranır: ölkəmizdəki bütün ali təhsil müəssisələri - həm özəl, həm də region universitetləri bu prosesi həyata keçirməyə hazırdırmı? Təşkilati baxımdan, proqram təminatı, struktur və hədəflər yönündən hələ tam hazır olmadıqları görünür. Bu isə göstərir ki, qəbul sistemində yeni yanaşmanın genişmiqyaslı tətbiqi üçün əlavə hazırlıq və islahatlara ehtiyac var".
