Rusiya ordusu noyabrın 29-na keçən gecədən başlayaraq səhərədək Ukraynanın paytaxtı Kiyevə növbəti dəfə çoxkombinasiyalı hava hücumu həyata keçirib.
Senzor.az yerli KİV-ə istinadən bildirir ki, gecə saatlarında hava hücumundan müdafiə sistemi işə düşüb, partlayış səsləri eşidilib. Hava hücumu zamanı müxtəlif tipli, o cümlədən ballistik raketlərdən, zərbə dronlarından istifadə edilib.
Zərərsizləşdirilən dronlar və raketlər Kiyevin bəzi yaşayış binalarında yanğına səbəb olub.
Kiyev şəhər meri Vitali Kliçko “Teleqram” səhifəsində yazıb ki, hava hücumu nəticəsində Darnitsk və Şevçenko rayonlarının çoxmərtəbəli binalarında dağıntılar qeydə alınıb. Həmin rayonlara həkim çağırışları qeydə alınıb...
Dəqiqləşdirilmiş son məlumatlara görə, hava hücumu nəticəsində azı 2 nəfər həlak olub, 15 nəfər xəsarət alıb. Xəsarət alanların 8-i xəstəxanaya yerləşdirilib.
Hava hücumu zamanı Kiyev şəhərinin və onun vilayətindəki enerji infrastrukturlarına ciddi ziyan dəyib. Hazırda Kiyev şəhərinin bir hissəsi işıqsız qalıb.
