Dünyanın müxtəlif yerlərindən gələn ziyarətçilərin marağını qazanan “insan yuyan maşın” artıq Yaponiyada satışa çıxarılıb.
Tribuna xəbər verir ki, bu barədə şirkət sözçüsü cümə günü bildirib.
İstifadəçilər kapsula uzanır, qapağı bağlayır və paltaryuyan maşındakı kimi — amma fırlanma olmadan — həm fiziki təmizlənir, həm də musiqi ilə rahatlayırlar.
“Gələcəyin insan yuyanı” adlanan bu cihazın prototipi, altı ay davam edən və 27 milyondan çox insanın ziyarət etdiyi Osaka Dünya Sərgisində uzun növbələr yaratmışdı.
Bu cihaz Yaponiyanın “Science” adlı şirkəti tərəfindən hazırlanıb və 1970-də Osakada keçirilən sərgidə nümayiş olunan oxşar məhsulun modernləşdirilmiş versiyasıdır.
“Şirkət prezidentimiz həmin məhsulu ilk dəfə görəndə 10 yaşında idi və çox təsirlənmişdi”, — deyə şirkətin sözçüsü Saçiko Maekura AFP-ə bildirib.
O əlavə edib ki, bu maşın “təkcə bədəni deyil, həm də ruhu yuyur”, həmçinin istifadəçilərin ürək döyüntüsünü və digər həyati göstəricilərini izləyir.
ABŞ-da bir kurort şirkəti Science ilə əlaqə saxlayaraq prototipin kommersiyalaşdırılıb-çıkarılmayacağını soruşduqdan sonra, firma cihazın real istehsalına başlamaq qərarına gəlib.
Osakada yerləşən bir otel maşının ilk nüsxəsini alıb və qonaqlara bu xidməti təklif etməyə hazırlaşır.
Digər müştərilər arasında Yaponiyanın iri elektronika satıcısı Yamada Denki də var. Şirkət bu unikal cihazın mağazalara daha çox insan cəlb edəcəyinə ümid edir.
“Bu cihazın cazibəsinin bir hissəsi onun nadirliyidir, buna görə təxminən cəmi 50 ədəd istehsal etməyi planlaşdırırıq”, — Maekura deyib.
Yerli mediaya görə, cihazın satış qiyməti 60 milyon yen (385 min dollar) olacaq.
İmran Kərimli
