Qambiya bayrağı altında üzən "Virat" tankeri Türkiyə sahilləri yaxınlığında yenidən pilotsuz aparatların hücumuna məruz qalıb.
APA xəbər verir ki, bu barədə NTV telekanalı öz mənbələrinə istinadən məlumat yayıb.
Bundan əvvəl məlumat verilmişdi ki, cümə günü axşam saatlarında pilotsuz uçuz aparatlarının hücumu nəticəsində tankerdə yanğın baş verib. Gəmidə olan 20 ekipaj üzvünün hamısı təxliyə edilib.
NTV-nin məlumatına görə, şənbə günü səhər məlum olub ki, “Virat” tankeri yeni hücum nəticəsində gövdəsində kiçik zədələr alıb. Bu zərər pilotsuz dəniz aparatlarının hücumu ilə əlaqələndirilir.
İlqar Xudiyev
***
05:01
Türkiyənin nəqliyyat və infrastruktur naziri Əbdülqadir Uraloğlu ticarət gəmilərində baş verən partlayışlarla bağlı açıqlama verib.
APA Türkiyə mətbuatına istinadən xəbər verir ki, türkiyəli nazir Qara dəniz sahillərində neft yüklü “Kairos” və “Virat” baş vermiş partlayışların xarici müdaxilə səbəbilə ola biləcəyini deyib.
“Çağrı mərkəzlərimizə birinci gəminin minaya düşdüyü barədə məlumat daxil oldu. Daha sonra ikinci gəmidə partlayış barədə məlumat aldıq. Hər iki gəminin heyətini təhlükəsiz şəkildə xilas etdik və sahilə çıxardıq. Üç qayığımız davam edən yanğını söndürməyə davam edir. Partlayışlardan ilk ağıla gələn xarici müdaxilədir ki, bunlar da mina, raket, qayıq və ya dron ola bilər. Hazırda məsələ ilə bağlı heç bir dəqiq məlumata malik deyilik. Lakin biz hər iki gəmini izləyirik”, - nazir bildirib.
***
01:59
Kocaeli valisi İlhami Aktaş Rusiyaya aid gəmidən baş verən yanğının davam etdiyini açıqlayıb.
APA Türkiyə mətbuatına istinadən xəbər verir ki, Qara dənizdə "Virat" adlı bir digər gəminin də zədələndiyi bildirilir.
Gəminin 20 ekipaj üzvünün təxliyə edildiyi və vəziyyətlərinin yaxşı olduğu bildirilib.
"Virat tankerinin Qara dənizdə təxminən 35 dəniz mili məsafədə vurulduğu bildirilib. Hadisə yerinə xilasetmə qrupları və bir ticarət gəmisi göndərilib. Gəmidəki 20 heyət üzvünün hamısının vəziyyəti yaxşıdır və mühərrik otağında güclü tüstü aşkar edilib. Vəziyyət nəzarət altındadır", - Türkiyənin Dənizçilik Baş İdarəsinin hadisə ilə bağlı açıqlamasında deyilir.
***
20:28
Qara dənizdə Rusiyaya məxsus bir gəmidə partlayış baş verib.
APA-nın Türkiyə bürosu yerli mətbuata istinadən xəbər verir ki, İstanbul boğazının girişinə yaxın bir mövqedə, Qara dəniz sularında səfərdə olan “KAIROS” adlı xam neft tankerində güclü partlayış olub.
Partlayışdan sonra sözügedən tankerdə yanğın başlayıb. Hazırda tankerdəki 25 nəfərlik heyətin xilas edilməsi istiqamətində işlər davam etdirilir.
Hadisənin Kocaeli vilayəti yaxınlığında baş verdiyi bildirilir. Kocaeli valiliyi hadisə yerinə aidiyyəti qurumların əməkdaşlarının cəlb edildiyini və lazımi müdaxilələrin davam etdiyini açıqlayıb.
“Yanğının səbəbi ilə bağlı hələlik dəqiq informasiya yoxdur. Lakin 25 nəfərlik heyətin hamısı sahil mühafizə və dəniz təhlükəsizliyi briqadaları tərəfindən təhlükəsiz şəkildə təxliyə edilib. Əldə etdiyimiz ilkin məlumatlara görə, heyətin vəziyyəti yaxşıdır və hər hansı xəsarət faktı qeydə alınmayıb”, - Kocaeli valisi İlhami Aktaş bildirib. O həmçinin yanğının davam etdiyini deyib.
Türkiyə Dənizçilik İdarəsi hadisə ilə bağlı açıqlama yayıb.
Açıqlamada, Rusiyanın Novorossiysk limanına gedən boş KAIROS tankerinin Türkiyə sahillərindən 28 mil aralıda xarici faktor səbəbindən alovlandığı, gəmidə olan 25 nəfərlik heyət üzvünün hamısı gəmidən təxliyə edildiyi və vəziyyətinin yaxşı olduğu bildirilib.
“Dənizçilərin təxliyəsi üçün bölgəyə xilasedicilər göndərilib, proses nəzarət altında saxlanılır”, - deyə açıqlamada qeyd olunub.
“Reuters” agentliyi isə gəminin batma təhlükəsinin olduğu haqda məlumat yayıb.
