Bakı sürətlə dəyişir, inkişaf edir və dünyanın böyük şəhərlərində müşahidə olunan yenilikləri özündə göstərməyə davam edir.
Paytaxt sakinləri gündəlik həyatlarında yenilikləri hiss edirlər.
Son aylarda şəhərin demək olar ki, hər guşəsində biri-birindən fərqli, bahalı, gözəl kofe məkanlarının açılması diqqətdən yayınmır.
Modern.az-ın əldə etdiyi məlumata görə, bu sürətli artımın maraqlı səbəbi var. Gənc nazirlər arasında qeyri-rəsmi “kofe yarışı” başlayıb.
Məlumatlara əsasən, bir sıra nazirlər özlərinə məxsus kofe brendləri yaratmağa və onları populyar məkanlarda yerləşdirməyə başlayıblar. Hətta xaricdə də bunu edirlər.
Bakıda əsas “yarış meydanları” kimi Ağşəhər, Fəvvarələr meydanı, "Gənclik" və "Nərimanov" metrostansiyalarının ətrafı qeyd olunur. Şəhərin digər bölgələrində də onlara aid kofe məkanları var.
Odur ki, Bakıda hər addımda yeni kofe köşkü, fərqli dad, fərqli konseptlə qarşılaşmaq mümkündür.
Biz də bu dinamikanı maraqla izləyirik. Bir tərəfdən şəhərin kofe mədəniyyətinin inkişaf etməsi sevindiricidir, çünki bu, bir mədəniyyətdir.
Digər tərəfdən isə nazirlərin bu sahəyə marağı adamı xeyli qayğılandırır. Çünki istər-istəməz nazirlər öz iş vaxtlarından və inzibati resurslarından buraya da ayırırlar.
Paytaxtda yeni kofe mədəniyyətinin formalaşması şəhərin sosial həyatını canlandırır. Nazirlərin bu qeyri-rəsmi “yarışı” da Bakının modern ruhuna bir çalar qatır.
Əsas odur ki, rəsmi işlər yaddan çıxmasın. Əgər həm iş gedir, həm də kofe məkanları açılırsa, demək, vəziyyət əladır.
NUŞ OLSUN!
Elnur ƏMİROV
