Noyabrın 28-də Bakı Slavyan Universitetinin (BSU) İsmayıllı rayonunda növbəti Strateji İnkişaf Planının (SİP) məzmunu və hədəflərinə dair növbəti komanda toplantısı (timbildinq) təşkil olunub. Tədbirdə BSU-nun rektoru Anar Nağıyev, professor-müəllim heyəti və tələbələr iştirak ediblər.
Moderator.az xəbər verir ki, timbildinqdə iştirak edən SEFT Consulting şirkətinin direktoru İlkin Nəzərov SİP-in (Strateji İnkişaf Planı) mahiyyəti, Azərbaycan Milli Kvalifikasiya Sisteminin rolu və ali təhsil ekosisteminin əsas xüsusiyyətləri barədə məlumat verib. O, təhsil sistemi və müxtəlif nəsillər üzrə aparılan təhlillərə toxunaraq strateji və operativ planlaşdırma arasındakı fərqləri izah edib. İ.Nəzərov ali təhsil müəssisənin fəaliyyət planında nəzərə alınmalı elementlər, eləcə də monitorinq və qiymətləndirmə proseslərinin düzgün qurulması barədə fikirlerini diqqətə çatdırıb.
BSU-nun Tədris departamentinin direktoru Zümrüd Yolçuyeva SİP-dən irəli gələn səriştəəsaslı təhsil proqramların formalaşması və innovasiya ekosistemi sistemi ilə bağlı məlumat verib. Z.Yolçuyeva BSU-nun SİP çərçivəsində əldə olunan nəticələr barədə danışaraq keyfiyyət mədəniyyəti, eləcə də ömürboyu öyrənmə istiqamətində mühüm işlərin görüldüyünü qeyd edib.
Sonda komanda işi çərçivəsində altı komanda tərəfindən SİP-dən irəli gələn güclü və zəif tərəflər, eləcə də mövcud imkanlar və təhdidlər müzakirə edilib. Tədbirdə SİP-in yeni redaksiyası ilə bağlı müxtəlif təkliflər dinlənilib.
