Konkret.az portalından verilən məlumata əsasən, ain.az bildirir.
Azərbaycanda yeni avtomobillərin bahalığı bir çoxlarını ikinci əl nəqliyyat vasitəsi almağa sövq edir.
Bəs bu avtomobillər nə qədər etibarlı sayılır?
Mövzu ilə bağlı KONKRET.az-a açıqlama verən nəqliyyat məsələləri üzrə ekspert Yasin Mustafayev bildirib ki, hazırda ikinci əl avtomobil bazarında qiymətlər xeyli aşağı düşüb. Onun sözlərinə görə, Çindən gətirilən yeni avtomobillərin həm qiymət baxımından əlçatan olması, həm də komfort və keyfiyyət səviyyəsinin qənaətbəxş görünməsi alıcıların seçimində ciddi dəyişiklik yaradıb.
Yasin Mustafayev
“İnsanlar artıq ikinci əl avtomobil almaqdansa, münasib qiymətə yeni Çin avtomobili əldə etməyə üstünlük verirlər. Bu da ikinci əl bazarında durğunluğa və ucuzlaşmaya səbəb olub”, – deyə ekspert bildirib.
Bununla belə, Mustafayev hesab edir ki, maddi imkanı məhdud olanlar üçün ikinci əl avtomobil hələ də alternativ olaraq qalır. O, alıcılara mütləq peşəkar ustaya müraciət etməyi tövsiyə edib:
“Maşının vurulub-vurulmadığını, boyanıb-boyanmadığını, hər hansı qəza keçirib-keçirmədiyini dəqiqləşdirmək vacibdir. Bütün bu məqamlar araşdırıldıqdan sonra avtomobilin real qiymətini müəyyənləşdirmək mümkündür.”
Ekspert əlavə edib ki, diqqətsizlik gələcəkdə ciddi xərclərə və təhlükəsizlik risklərinə səbəb ola bilər.
Aynurə İsmayıl
KONKRET.az
Daha ətraflı məlumat və yeniliklər üçün ain.az saytını izləyin.
