Elçin Əfəndi: “Yeni qaydanın məqsədi repetitorluğun azalmasıdır”
Son günlər cəmiyyətdə geniş müzakirə olunan mövzulardan biri məktəblərdə müəllimlər üçün tətbiq edilməsi nəzərdə tutulan yeni iş modelidir. Elm və təhsil naziri Emin Əmrullayevin açıqlamasına görə, yeni model tamamilə könüllülük və rəqabət prinsiplərinə əsaslanacaq, müəllimlər üçün məcburi olmayacaq. Bu sistem çərçivəsində müəllimlər daimi işlə təmin ediləcək və onların əməyi daha yüksək əməkhaqqı ilə dəyərləndiriləcək.
Yeni modelə əsasən, tam ştatlı müəllimlərin dərs yükü həftədə 18–24 saat olacaq, qalan vaxt isə metodik hazırlıq, şagirdlərlə fərdi iş və müxtəlif layihələrdə iştirak kimi fəaliyyətlərə sərf ediləcək.
Məlum qərarın verilməsində məqsədmüəllimləri bütün vaxtını, gününü məktəbdə keçirməyə məcbur etmək və beləliklə də repetitorluğun qarşısını almaqdır. Görəsən, bu özünü doğrulda biləcəkmi? Reperitorluğa bununla son qoymaq olarmı?
“Onlar repetitor fəaliyyəti ilə məşğul olmaq istəyirlərsə, bunu məktəbdən kənarda həyata keçirməlidirlər”
Təhsil eksperti Elçin Əfəndi baki-xeber.com-a şərhində bildirdi ki, yeni qaydanın məqsədi repetitorluğun azalmasıdır: “Hər hansı müəllim təhsil müəssisəsinə yalnız şagird toplamaq niyyəti ilə, 5-6 saat dərs demək üçün gəlirsə, bu, peşəkarlıqla uzlaşmır. Belə müəllimlər prosesdən kənarlaşdırılmalı, onlar repetitor fəaliyyəti ilə məşğul olmaq istəyirlərsə, bunu məktəbdən kənarda həyata keçirməlidirlər. Təhsil müəssisələrində isə məhz peşəsini sevən, müəllimliyə hörmətlə yanaşan, auditoriyada şagirdlərin öyrənməsinə həqiqi maraq göstərən şəxslər çalışmalıdır. Qarşıdakı illərdə atılacaq addımlar da bu məqsədə xidmət edəcək”.
O, həmçinin vurğulayıb ki, effektiv nəticələrə gəldikdə, əlbəttə ki, müsbət nəticələr olacaq: “Əvvəla, valideynlər əlavə maliyyə yükündən azad olacaqlar, çünki hazırda repetitorlara ayda minimum 400-500 manat, maksimum isə 1500-2000 manatadək ödəniş olunur. Bu hazırlıq prosesinin dövlət tərəfindən məktəbdə həyata keçirilməsi həm ailələr üçün böyük dəstək olacaq, həm də abituriyentlər seçdikləri istiqamətlər üzrə daha sistemli şəkildə hazırlaşacaqlar. Bu da məktəb mühitinə və tədrisin keyfiyyətinə müsbət təsir göstərəcək”
Günel CƏLİLOVA
