Qazaxıstan Energetika Nazirliyi təcili olaraq neft ixracını alternativ marşrutlara yönəltmək niyyətindədir.
Teleqraf "Kommersant"a istinadən xəbər verir ki, bu qərar Ukrayna Silahlı Qüvvələrinin Novorossiysk yaxınlığındakı Xəzər Boru Kəməri Konsorsiumunun (KPC) dəniz terminalına hücumu ilə əlaqədar qəbul edilib.
"Vəziyyət Qazaxıstan Respublikası Hökumətinin xüsusi nəzarəti altındadır", - Qazaxıstan Energetika Nazirliyinin mətbuat xidmətindən bildirilib.
Nazirlik xatırladıb ki, KPC beynəlxalq layihədir və ona qarşı hücumlar qlobal enerji təhlükəsizliyinə birbaşa təhdid yaradır.
Qeyd olunur ki, moyabrın 29-na keçən gecə Ukrayna Silahlı Qüvvələrinin pilotsuz katerləri Novorossiysk yaxınlığındakı KPC dəniz terminalına zərbələr endirib. Konsorsiumdan verilən məlumata görə, dayaqlardan biri zədələnib və onu bərpa etmək mümkün deyil. Hücum zamanı canlı itki olmayıb.
