Bakı Slavyan Universitetinin (BSU) İsmayıllı rayonunda Strateji İnkişaf Planının (SİP) məzmunu və hədəflərinə dair növbəti komanda toplantısı (timbildinq) təşkil olunub. Tədbirdə BSU-nun rektoru Anar Nağıyev, professor-müəllim heyəti və tələbələr iştirak ediblər.
Universitetdən TƏHSİL.BİZ-ə bildirilib ki, timbildinqdə iştirak edən “SEFT Consulting” şirkətinin direktoru İlkin Nəzərov SİP-in mahiyyəti, Azərbaycan milli kvalifikasiya sisteminin rolu və ali təhsil ekosisteminin əsas xüsusiyyətləri barədə məlumat verib. O, təhsil sistemi və müxtəlif nəsillər üzrə aparılan təhlillərə toxunaraq strateji və operativ planlaşdırma arasındakı fərqləri izah edib. İ.Nəzərov ali təhsil müəssisənin fəaliyyət planında nəzərə alınmalı elementlər, monitorinq və qiymətləndirmə proseslərinin düzgün qurulması barədə fikirlərini diqqətə çatdırıb.
BSU-nun Tədris departamentinin direktoru Zümrüd Yolçuyeva SİP-dən irəli gələn səriştəəsaslı təhsil proqramlarının formalaşdırılması və innovasiya ekosistemi haqqında məlumat verib. Z.Yolçuyeva BSU-nun SİP çərçivəsində əldə olunan nəticələri barədə danışaraq keyfiyyət mədəniyyəti, eləcə də ömür boyu öyrənmə istiqamətində mühüm işlərin görüldüyünü qeyd edib.
Sonda altı komanda tərəfindən SİP-dən irəli gələn güclü və zəif tərəflər, mövcud imkanlar və təhdidlər müzakirə edilib. Tədbirdə SİP-in yeni redaksiyası ilə bağlı təkliflər dinlənilib.
