İran və ABŞ tərəfindən hazırlanan memorandum digər məsələlərlə yanaşı, sülh sazişi bağlanacağı halda, İranın xaricdəki 25 milyard dollar məbləğində aktivlərinin sərbəst buraxılmasını nəzərdə tutur.
Bu barədə "The New York Times" (NYT) İran mənbələrinə istinadən yazıb.
Bununla belə, söhbətin məhz ABŞ-də, yoxsa digər ölkələrdə dondurulmuş aktivlərdən getdiyi dəqiqləşdirilməyib
Nəşrin məlumatına görə, razılaşma həmçinin bütün hərbi əməliyyatların, o cümlədən Livanda İsrail və "Hizbullah" qruplaşması arasındakı döyüşlərin dayandırılmasını, eləcə də Hörmüz boğazının Tehran tərəfindən rüsumlar tətbiq edilmədən müvəqqəti açılmasını nəzərdə tutur.
"İran gəmilərin Hörmüz boğazından keçməsinə icazə verəcək, hələlik rüsum və ya digər xərclər ödənilmədən. Bunun əvəzində ABŞ İran limanlarının dəniz blokadasını dayandıracaq", - məqalədə qeyd olunub.
Dəqiqləşdirilib ki, Vaşinqton və Tehran arasında sonrakı danışıqlar zamanı digər mübahisəli və mühüm məsələlərin həlli üçün memorandum çərçivəsindəki bu müvəqqəti şərtlər təxminən 60 gün ərzində qüvvədə olacaq. Belə məsələlərdən biri İranın nüvə proqramıdır.
Daha əvvəl ABŞ Prezidenti Donald Tramp tərəflərin memorandumu imzalamağa yaxın olduqlarını bildirmişdi.
