Ukrayna Müdafiə Nazirliyinin Baş Kəşfiyyat İdarəsi Rusiya Silahlı Qüvvələrinin Cənub Hərbi Dairəsinin müvəqqəti icraçı rəhbəri, general-mayor Sergey Zemskov tərəfindən göndərilən təlimatları açıqlayıb.
Moderator.az bu haqda “TSN”-ə istinadla xəbər verir.
Təlimatda, Cənub Hərbi Dairəsinin komandanının Ermənistanın Gümrü şəhərində yerləşən Rusiya hərbi bazasını gücləndirmək üçün əlavə qüvvələr göndərmək barədə verdiyi əmr yer alır. Hərbi bazanın möhkəmləndirilməsi məqsədilə, həmin bölgəyə əlavə hərbi heyətin göndərilməsi planlaşdırılır.
Əsas tədbirlər:
Təlimatda göstərilir ki, 8-ci, 18-ci, 49-cu və 58-ci ümumi qoşunlar ordusunun hərbi qulluqçuları arasında, Cənub Hərbi Dairəsinin hərbi hissələrini gücləndirmək üçün təcili şəxsi heyət seçimi aparılacaq. Seçim, 13 may - 11 iyun 2025-ci il tarixləri arasında həyata keçiriləcək və məqsəd, ilk müqavilələrin bağlanması və yeni qulluqçuların Gümrü hərbi bazasına göndərilməsidir.
Hərbi rəhbərlərə, Gümrüdəki xidmət üçün seçimin effektivliyini təmin etmək məqsədilə tədbirlər görmələri tapşırılıb. İrəli sürülən şəxslər üçün peşə bacarıqları, psixoloji dayanıqlılıq və döyüş hazırlığı səviyyəsinə dair tələblər müəyyən edilib. Xüsusilə, narkotik və psixotrop maddələrin qeyri-qanuni dövriyyəsində iştirak etmiş şəxslərin xidmətə qəbul edilməməsi vurğulanıb.
Xəbərdə qeyd edilir ki, bundan əvvəl Ermənistan Xarici İşlər Nazirliyi, ölkənin ərazisinin qonşu dövlətlərə qarşı hərbi əməliyyatlar üçün istifadə edilə biləcəyi ilə bağlı yayılmış xəbərləri təkzib edib. Bundan əlavə, Ukrayna Müdafiə Nazirliyinin Kəşfiyyat İdarəsi, Rusiyanın Gümrü hərbi bazasında mövcudluğunu artırmasının, Azərbaycanla qarşıdurma ehtimalının artması səbəbindən olduğu qənaətindədir. İdarə, bu addımın, Kremlin Cənubi Qafqazda sabitliyi pozmaq məqsədini güdən bir siyasətinin tərkib hissəsi olduğunu bildirib.
