Ötən il Gürcüstanın Azərbaycanla ticarət dövriyyəsinin dəyəri 1,36 milyard ABŞ dolları təşkil edib.
APA-nın yerli bürosu xəbər verir ki, bu barədə Gürcüstanın Milli Statistika İdarəsinin 2025-ci il üzrə ilkin hesabatında bildirilib.
İllik müqayisədə ticarət əməliyyatlarının həcmi 3,82% artıb.
Hesabat ilində Azərbaycan Gürcüstanın ümumi ticarət dövriyyəsində 5,3% payla qonşu ölkənin əsas ticarət tərəfdaşları arasında Türkiyə, ABŞ, Rusiya, Çin, Qırğızıstan və Almaniyadan sonra VII yerdə qərarlaşıb.
Gürcüstandan Azərbaycana 697,2 milyon ABŞ dolları dəyərində məhsul ixracı həyata keçirilib ki, bu da illik müqayisədə 3,8% azdır. Azərbaycan Gürcüstanın ixracında 9,6% payla qonşu ölkənin əsas ixrac tərəfdaşları arasında Qırğızıstan, Qazaxıstan və Rusiyadan sonra IV yeri tutub.
Gürcüstanın Azərbaycandan idxal etdiyi məhsulların dəyəri isə 2024-cü illə müqayisədə 13,2% artaraq 661 milyon ABŞ dollarına bərabər olub. Azərbaycan 3,6% payla qonşu ölkənin Türkiyə, ABŞ, Çin, Rusiya və Almaniyadan sonra VI əsas idxal tərəfdaşı olub.
2025-ci ildə Gürcüstanın xarici ticarət dövriyyəsi 25,8 milyard ABŞ dolları olub ki, bunun da 7,29 milyard ABŞ dollarını qonşu ölkədən ixrac olunmuş məhsulların, 18,5 milyard ABŞ dollarını isə idxal məhsullarının dəyəri təşkil edib.
Qeyd edək ki, 2024-cü illə müqayisədə Azərbaycan ötən il Gürcüstanın xarici ticarətində və ixracında mövqelərini itirib. Belə ki, həmin ildə Azərbaycan qonşu ölkənin VI əsas ticarət, Qırğızıstan, Qazaxıstandan sonra isə III əsas ixrac tərəfdaşı olub. Son iki ildə Azərbaycan Gürcüstanın idxal tərəfdaşları arasındakı mövqeyini (VI yer) isə qoruyub saxlayıb.
