Siyahıda İranın nüvə və raket obyektlərinə əlavə zərbələr, eləcə də ABŞ xüsusi təyinatlılarının reydləri də yer alır...
Poliqon xəbər verir ki, The New York Times nəşrinin məlumatına görə, ABŞ Prezidenti Donald Tramp İrana qarşı mümkün hərbi addımların genişləndirilmiş variantlar paketini əldə edib. Bildirilir ki, bu variantlar İranın nüvə və raket infrastrukturlarına daha ciddi zərər vurmağa, yaxud İslam Respublikasının ali rəhbəri Əli Xameneinin mövqelərini zəiflətməyə yönəlmiş ssenariləri ehtiva edir.
Nəşrin yazdığına görə, hazırkı seçimlər arasında ABŞ qüvvələrinin İran ərazisində yerləşən müəyyən obyektlərə kommandos reydləri həyata keçirməsi ehtimalı da müzakirə mövzusudur. Belə əməliyyatların gündəmə gəlməsi isə yalnız hava zərbələri ilə İranın dərin şəkildə qorunan nüvə infrastrukturu elementlərini sıradan çıxarmağın mümkünlüyü ilə bağlı şübhələrin artması fonunda baş verir.
Mənbələrin bildirdiyinə görə, hazırda hərbi gücdən istifadə ilə bağlı yekun qərar verilməyib. Rəsmi şəxslər qeyd edirlər ki, Tramp təqdim edilən variantlardan heç birinə sanksiya verməyib və diplomatik həll imkanını hələ də istisna etmir. Eyni zamanda administrasiyanın bəzi nümayəndələri etiraf edirlər ki, hərbi əməliyyatlarla bağlı ictimai təhdidlər böyük ölçüdə İranı yenidən danışıqlar masasına qaytarmaq məqsədi daşıyıb.
Son günlərdə Trampın İranda hakimiyyət dəyişikliyi ssenarisinin nə dərəcədə real ola biləcəyi barədə də düşündüyü vurğulanır. Bununla belə, hətta sərt xətt tərəfdarları belə, belə bir prosesin nəticələrinin əvvəlcədən dəqiq proqnozlaşdırılmasının çətin olduğunu qəbul edirlər. Nəşr qeyd edir ki, mümkün hərbi ssenarilərin müzakirəsi Vaşinqtonun Tehrana təzyiq rıçaqlarını artırmaq cəhdləri fonunda aparılır və bu, regionda gərginliyin daha da yüksəlməsi riskini gücləndirir.
Poliqon.info
