Azərbaycan Kubokunun cari mövsümündə ilk, tarixdə 35-ci

Futbol üzrə Azərbaycan kubokunun 2025/2026 mövsümündə ilk dəfə penaltilər seriyasından istifadəyə zərurət yaranıb.

Arena.az xəbər verir ki, 1/4 final mərhələsinin “Qəbələ” – “Sabah” cütünün taleyi penaltilər seriyasında həll olunub.

Bakıda 0:0, Qəbələdə 3:3 hesablı heç-heçə edən rəqiblərin duelində yekunda paytaxt təmsilçisi qalib gəlib – 4:2. Bu, ölkə kuboku tarixində 35-ci penaltilər seriyası olub.

Sonuncu belə matç da “Sabah”ın iştirakı ilə olub. Bakı klubu 2024/2025-ci illər mövsümünün 1/8 finalında “Turan Tovuz”dan üstün olub – 2:2, 3:1.

“Sabah” Azərbaycan Kubokunun tarixində ikinci dəfə vurduğu penaltilər seriyasında yenə qalib gəlib.

“Qəbələ” 5-ci dəfə kubok matçında belə hadisə ilə üzləşib. 2 qələbəsi olan komanda 3-cü dəfə məğlub olub. “Qırmızı-qaralar” 2007/2008-ci illər mövsümündə 1/4 finalda “Bakı”ya (1:1, 1:1, pen.4:3), 2016/2017-ci illər mövsümündə 1/8 finalda “Zaqatala”ya (2:2, pen.4:1) qalib gəlib. 2013/2014-cü illər mövsümündə finalda (1:1, pen.2:3), 2015/2016-cı illər mövsümündə yarımfinalda (1:1, 1:1, pen.3:4) “Neftçi”yə qarşı duellər uğursuz olub.