ABŞ prezidenti bildirib ki, İrandakı daxili parçalanma və İslamabadın müraciəti nəzərə alınaraq hücum təxirə salınıb, lakin ABŞ qüvvələri tam döyüş hazırlığında saxlanılır...
Poliqon xəbər verir ki, bu barədə Donald Trampın Truth Social platformasında paylaşdığı açıqlamada deyilir. ABŞ prezidenti bildirib ki, İran hakimiyyəti daxilində ciddi parçalanmanın müşahidə olunması, həmçinin Pakistanın feldmarşalı Asim Munir və baş naziri Şahbaz Şərifin müraciəti fonunda Tehrana qarşı planlaşdırılan hücumun təxirə salınması qərarı verilib.
Trampın sözlərinə görə, Pakistan tərəfi Vaşinqtondan xahiş edib ki, İran rəhbərliyi və onun nümayəndələri vahid mövqe ilə çıxış edə bilənədək hərbi əməliyyatlar ertələnsin. ABŞ prezidenti qeyd edib ki, bu müddət ərzində qarşı tərəfin ümumi təklif hazırlaması və danışıqlarda vahid yanaşma təqdim etməsi gözlənilir.
Ağ Ev rəhbəri vurğulayıb ki, hücumun təxirə salınması ABŞ-nin hərbi fəallığının tam dayandırılması anlamına gəlmir. Onun sözlərinə görə, Amerika hərbçilərinə blokadanı davam etdirmək, eyni zamanda bütün digər istiqamətlərdə yüksək hazırlıq və döyüş qabiliyyətini qorumaq tapşırılıb. Bu isə Vaşinqtonun diplomatik pəncərəni açıq saxlasa da, təzyiq alətlərindən geri çəkilmədiyini göstərir.
Tramp əlavə edib ki, atəşkəs rejimi İran tərəfinin yekun təklifi təqdim olunana və müzakirələr bu və ya digər şəkildə başa çatana qədər uzadılır. Bu açıqlama onu göstərir ki, Vaşinqton müvəqqəti fasiləyə razı olsa da, prosesin nəticəsiz qalacağı təqdirdə hərbi variantı gündəmdən çıxarmır.
Beləliklə, ABŞ prezidentinin bəyanatı bir tərəfdən Pakistanın vasitəçilik rolunun artdığını, digər tərəfdən isə İran böhranı ətrafında hərbi-siyasi gərginliyin hələ də yüksək olaraq qaldığını nümayiş etdirir. Mövcud şəraitdə atəşkəsin uzadılması münaqişənin həlli deyil, daha çox növbəti diplomatik təklif üçün verilmiş məhdud zaman pəncərəsi kimi qiymətləndirilir.
Poliqon.info
