Həzi Aslanov adına Ordu və İdeoloji Mədəniyyət Mərkəzinin “Mahnı və rəqs ansamblı”nın solisti Kəmalə Xəlilli açıqlamaları ilə diqqət çəkib.
Bizim.Media ilə həmsöhbət olan sənətçi bayağı mahnılardan və ifaçılardan söz açıb:
“Yeni mahnım işıq üzü gürdü, efirə tez-tez çıxacam. Müəyyən bir fasilə verməyi planlaşdırıram, payız aylarında yeni layihələrə, klip çəkilişlərinə başlayacam. Mən yaradıcı insanam, sənətimlə məşğulam, başqa heç nə məni maraqlandırmır. Söz-söhbətdən uzağam. Verilişlərə də dəvət edirlər sənət qalır kənarda, başqa suallar verirlər. Bilmirsən ki, yaradıcılıqdan danışasan, yoxsa qalmaqallı söhbətlərə baş qoşasan. Amma söz-söhbəti heç sevmirəm. Sevirəm ki, aparıcı məni dəvət edirsə, yeni layihələrimdən, bəstələrdən, mahnılardan danışsınlar. Amma bunlar qıraqda qalır, reytinq üçün söz-söhbət yaradırlar. İnanın ki, belə şeylərə ehtiyac duymuram. O insanlar söz-söhbət yaradırlar ki, yeni planları işləri yoxdur. Bir-iki nəsə təqdim edib qalmaqalla gündəmdə qalmaq istəyirlər. İş, yaradıcılıq kənarda qalır, boş-boş söhbətlər edirlər. Bu günümüzün faciəsi bayağı mahnılardır. Adlarını çəkmək istəmirəm, amma özləri çox gözəl bilir, gündəmdə olan adamlardır. İnanın sənətdən xəbərləri olmayan insanlardır, boş-boş şeylərdir. Mahnılar heç nədir, bəstəsi, sözləri məlum deyil kimindir. Əvvəllər bilinirdi ki, bəstəkar kimdir, şair kimdir. İndi çıxıb deyirlər ki, bəstəkları da, ifaçısı da, şairi də mənəm. Buna öz-fəaliyyət kimi baxıram. Heç bir yaradıcılıqdan söhbət gedə bilməz. Hər bir işin öz peşəkarı var. Necə istedad olmalısan ki, bunların hamısı səndə cəmlənsin. Ona da inanmıram, çünki indiki mahnılar da ortadadır. Kim deyirsə, bunu özüm bəstələmişəm, yazmışam, hamısı “üç badam bir qoz”dur. Ömrü də çox az olur, 3 günlük mahnılardır. İllərdir yaşayan mahnılarımız var, korifey sənətkarlarımız, bəstəkarlarımız olub. Bu gün isə çox azdır”.
O bildirib ki, hazırda bayağılıq artıb:
“Zaman gələcək bunların hamısı aradan qaldırılacaq, yenə də həmin günlər qayıdacaq, hər şey öz yerini tapacaq. Bacardığım qədər bu şeylərdən, bayağı mahnılardan uzağam. Oxuyacağım çox gözəl sənətkar mahnıları var. Bəstəkarlarımızın əsərlərini səsləndirirəm, elə də davam edəcəyəm. Mənim ruhum da belədir. İndi desinlər ki, bu mahnını oxu nəsə əldə edəcəksən. Mən orada nəsə tapmıram. Oxuyanda özümü xoşbəxt hiss etməliyəm, özümü görmürəm, həm də xarakterimə uyğun deyil. Pis musiqi yoxdur, pis ifaçı var. Elə bir mahnıya yeni nəfəs verə bilərik ki, möhtəşəm olar. Amma bunlar guya yenilik yaradır, sintez edirlər. İndi də meyxana ilə qarışdırırlar, sintez edirlər. Meyxana tipli mahnılar olur. Nə bəndi var, nə nəqarəti, nə musiqisi. Ona görə də ömrü olmur o mahnıların. Yaşım az olsa da, sənətkarlar içində böyümüşəm, elə dahilər görmüşəm ki... Rəşid Behbudov adına Mahnı Teatrında solist işləyəndə kollektivdən eşitmişdim. Deyirdilər ki, Rəşid Behbudov bir mahnı üzərində 6 ay işləyirmiş. Sonra qərara gəlirmiş ki, bu mahnını yazdırım ya yox. Ona görə də o mahnılar bu gün də aktuallığını saxlayıb, min illər də keçsə, qalacaq. Sənətkarlar o mahnıların üzərində aylarla çalışıblar, məşq ediblər. Yoxa mümkün deyil ki, gedim studiyaya ağzıma gələni oxuyum. O mahnının ömrü də olmayacaq, heç ona mahnı da demək olmaz”.
Sara, Bizim.Media
- Gecə Modu
- Ana səhifə
- Statistika
- Mənbələr
- Reytinq
- Hava
- Valyuta
