"Fransada məktəb işçisi bıçaqlanaraq öldürülüb, Avstriyada isə məktəbə silahlı hücum nəticəsində 11 nəfər həyatını itirib. Avropa liderləri təcili və sərt tədbirlər tələb edir..."
Avropada məktəblərdə baş verən iki faciəvi hücum cəmiyyətləri şoka salıb və məktəblərdə təhlükəsizlik məsələsini yenidən gündəmə gətirib. Fransa və Avstriyada eyni həftə ərzində yaşanan qanlı hadisələrdə məktəb işçiləri və şagirdlər həyatlarını itirib.
Moderator.az xəbər verir ki, bu barədə "24tv.ua" nəşri məlumat yayıb.
Fransada bıçaqlı hücum: məktəb əməkdaşı öldürülüb
Fransanın Nojan şəhərində yerləşən Fransuaza Dolto orta məktəbində şagirdlərdən biri məktəbə giriş zamanı çanta yoxlaması aparan müəllim köməkçisinə bıçaqla hücum edib. 31 yaşlı Melani adlı qadın xəstəxanada keçinib. Onun 4 yaşlı oğlu qalıb.
Hücum edən yeniyetmə hadisə yerində həbs olunub, lakin o, bir polis əməkdaşını da yaralamağa müvəffəq olub. Hücumçunun motivləri və etnik kimliyi açıqlanmır. Daxili işlər orqanlarının məlumatına görə, bu şəxs əvvəllər hüquq-mühafizə orqanlarına məlum olmayıb.
Fransa təhsil naziri Elizabet Born bildirib ki, bu şagird əvvəllər dəfələrlə qayda pozuntusuna görə dərslərdən uzaqlaşdırılsa da, son aylarda problem yaratmayıb. Müəllimləri isə onun belə bir zorakılığa əl atmasından "tamamilə şokdadır".
Fransa prezidenti Emmanuel Makron hadisəni kəskin şəkildə pisləyərək bildirib: "Uşaqlarımıza nəzarət edən bir qadın mənasız zorakılıq dalğasının qurbanı olub. Bütün ölkə matəmdədir və hökumət cinayətkarlığın azaldılması üçün hərəkətə keçir".
Radikal sağçı siyasətçi Marin Le Pen isə hökuməti günahlandıraraq deyib: "Fransa məktəblərində zorakılıq adi hala çevrilib. İctimai laqeydlik, həyatdan müqəddəslik anlayışının silinməsi və soyuq silah daşımanın yayılması ölkəni bəlaya sürükləyir. Artıq fransızlar qəti və mərhəmətsiz tədbirlər gözləyir".
Hadisədən sonra məktəbdə dərslər dayandırılıb və dərslərin yalnız cümə axşamı bərpa ediləcəyi bildirilib. Hücum edən yeniyetmə cinayət məsuliyyətinə cəlb olunacaq və onu 20 ilədək həbs gözləyir. Fransa hökuməti artıq məktəblərdə çanta yoxlamalarını gücləndirib və mart-may aylarında bu yoxlamalar zamanı 186 bıçaq aşkar olunub, 32 nəfər saxlanılıb.
Avstriyada məktəb qətliamı: 11 nəfər həlak olub
Avstriyanın Qrats şəhərində yerləşən orta məktəbdə baş verən silahlı hücum nəticəsində azı 11 nəfər həyatını itirib. Öldürülənlər arasında şagirdlər və müəllim də var. Şəhər meri Elke Kar bildirib ki, hücum edən şəxs məktəbin keçmiş şagirdidir və hadisədən sonra özünü məktəb tualetində güllələyib.
Hadisə səhər saatlarında baş verib. Polisin verdiyi məlumata görə, şübhəli şəxs təkbaşına hərəkət edib. Hücum zamanı əraziyə polis vertolyotu da cəlb olunub. Məktəb ətrafı tamamilə mühasirəyə alınıb, ictimai nəqliyyat istiqaməti dəyişdirilib və sakinlərə təhlükəsizlik qüvvələrinin göstərişlərinə əməl etmələri tövsiyə olunub.
Yerli mətbuatın yazdığına görə, hücum edən şəxs - Samuel Hayder silahlara fanatik marağı olan bir gənc olub. 2023-cü ildə Serbiya vasitəsilə "Vaqner" muzdlu dəstəsinə qoşulmaq istəsə də, hansısa səbəbdən rədd cavabı alıb. Bu məlumatlar hələlik rəsmi təsdiqini tapmayıb.
Hadisə ilə bağlı Avropa liderləri dərin təəssüf hissi keçirib. Avropa Komissiyasının rəhbəri Ursula fon der Lyayyen deyib: "Məktəblər gəncliyin, ümidin və gələcəyin rəmzidir. Bu məkanların ölümlə və zorakılıqla assosiasiya olunması ağrılıdır".
Avropa İttifaqının baş diplomatı Kaja Kallas isə bildirib: "Hər bir uşaq məktəbdə özünü təhlükəsizlikdə hiss etməli və qorxu olmadan təhsil almalıdır". Qeyd edək ki, Qrats təxminən 300 min əhalisi olan və Avstriyanın Ştiriya federal torpağının paytaxtı hesab olunur.
Avropa cəmiyyətinə çağırış
Art-arda baş verən bu iki qanlı hadisə Avropada məktəblərdə təhlükəsizliklə bağlı ciddi suallar doğurur. Həm Fransa, həm də Avstriya cəmiyyətində artıq geniş ictimai müzakirələr başlanıb - zorakılığın səbəbləri, gənclər arasında aqressiyanın artması və hökumətlərin məsuliyyəti gündəmdədir. Avropa liderləri isə bu hücumların qarşısını almaq üçün daha sərt və sistemli tədbirlərin görülməsini tələb edir.
