Absurd iddialar səsləndirən Rusiya Prezidentinin köməkçisi V. Medinski ölkəsinin keçmiş Dağlıq Qarabağ münaqişəsi ilə bağlı mövqeyini ya dərk etmir, ya da dərk etmək istəmir
Azərbaycan və Rusiya strateji tərəfdaşlıq münasibətlərinə malikdirlər. Respublikamız qonşu dövlətlə münasibətlərində bir qayda olaraq xoş məramdan çıxış edir. Ancaq təəssüf doğuran haldır ki, bir sıra hallarda Rusiyanın ayrı-ayrı rəsmi şəxslərinin açıqlamalarının məzmunu ikitərəfli strateji tərəfdaşlıq münasibətlərinin ruhuna uyğun gəlmir və ümumiyyətlə, həmin açıqlamalarda reallıq təhrif olunur. Rusiya Federasiyası Prezidentinin köməkçisi Vladimir Medinskinin bu günlərdə ifadə etdiyi absurd fikirlər də bu qəbildəndir.
Azərbaycan XİN Rusiya Prezidentinin köməkçisinin iddialarına münasibət bildirib. “Rusiya Federasiyası Prezidentinin köməkçisi Vladimir Medinskinin 9 iyun tarixində “Russia Today” kanalına müsahibəsi zamanı keçmiş Ermənistan-Azərbaycan münaqişəsi ilə bağlı faktların təhrif olunduğu, Qarabağ bölgəsini mübahisəli ərazi kimi təqdim edən açıqlaması təəssüf və təəccüb doğurur”. Bu barədə Xarici İşlər Nazirliyinin mətbuat katibi Ayxan Hacızadənin Rusiya Federasiyası Prezidentinin köməkçisi Vladimir Medinskinin keçmiş Ermənistan-Azərbaycan münaqişəsi ilə bağlı iddialarına dair şərhində bildirilir.
Qarabağ əzəli Azərbaycan torpağıdır
Azərbaycanın Vladimir Medinskinin absurd iddialarına kəskin münasibət bildirməsi tam başadüşüləndir. V.Medinski sıravi bir şəxs olsa idi, onun məlum açıqlamasını, bəlkə də, sakit qarşılamaq mümkün olardı. Ancaq axı Medinski böyük bir dövlətin rəsmi təmsilçisidir və öz məsuliyyətini dərk etməlidir. Ayxan Hacızadənin şərhində vurğulandığı kimi, təəccüblü hal odur ki, Rusiya Federasiyasının Prezidentinin köməkçisi, habelə Rusiyanın Tarix Təhsili üzrə Qurumlararası Komissiyasının sədri olan Medinski Qarabağın heç zaman mübahisəli ərazi olmadığını bilmir.
Tarix, zəngin mədəni irs nümunələri, toponimlər, zamanında Rusiyanın özünün tərtib etdiyi xəritələr Qarabağın əzəli Azərbaycan torpağı olduğunu əyani şəkildə təsdiqləyir. Tarixi mənbələrə əsasən, ermənilərin saxtakarlıqla “Stepanakert” adlandırdıqları Xankəndi XVIII əsrin axırlarında o dövrdə müstəqil Azərbaycan dövlətlərindən biri olan Qarabağ xanlığının başçılarının - xanların istirahəti üçün salınıb. Xanların fəaliyyətinə uyğun şərait yaradılması üçün istirahət məskəni xanlığın paytaxtı Pənahabadın (indiki Şuşanın) 10 kilometrliyində, nisbətən dağ ətəyində planlaşdırılır. Bu zaman istirahət məskəninin xanlığın digər vacib şəhər və kəndlərinə, o cümlədən Ağdama, Xocalıya, Malibəyliyə, Kərkicahana və digərlərinə yaxın olması da əsas götürülüb. Bəhs olunan məntəqələrin hamısında istisnasız olaraq azərbaycanlılar yaşayırdılar. Bu yerdə V.Medinskiyə Azərbaycan Prezidenti İlham Əliyevin bir neçə il bundan əvvəl Rusiyanın özünün təşkil etdiyi “Valday” Beynəlxalq Diskussiya Klubunda etdiyi çıxışında səsləndirdiyi fikirləri də xatırlatmaq istərdik. Dövlətimizin başçısı keçmiş sovet hakimiyyəti illərində Azərbaycan ərazisində artıq tarixdə qalmış Dağlıq Qarabağ Muxtar Vilayətinin yaradılmasından bəhs edərək vurğulayııb: “Qeyd etməliyəm ki, bu münaqişə ilə əlaqədar çox vaxt reallığı əks etdirməyən geniş fikir müxtəlifliyi var. Bu məsələyə aydınlıq gətirmək üçün deməliyəm ki, 1921-ci ildə Qafqaz bürosunun qərarında Dağlıq Qarabağın çox vaxt erməni tərəfinin interpretasiya etdiyi kimi, Azərbaycana verilməsi deyil, onun Azərbaycanın tərkibində qalması göstərilmişdir. Münaqişə başlayana qədər Azərbaycan SSR-in Dağlıq Qarabağ Muxtar Vilayətində yaşayan azərbaycanlı və erməni əhalinin say nisbəti 25:75 faiz kimi olub. Münaqişə nəticəsində Dağlıq Qarabağdan, həmçinin digər 7 rayondan bütün azərbaycanlı əhali qovulub, başqa sözlə desək, orada etnik təmizləmə aparılıb”.
Tarixi faktlar öz yerində. Medinski internetə girməklə hamıya açıq olan məlumatları əldə edə bilər. Digər tərəfdən, Medinskinin təmsil etdiyi Rusiya dövlətinin özü Qarabağı Azərbaycanın ərazisi kimi tanıyıb və tanıyır. Digər bir məsələ də sual doğurur. Məlumdur ki, Rusiya uzun illər ərzində keçmiş Dağlıq Qarabağ münaqişəsinin sülh yolu ilə həlli məqsədilə yaradılmış Minsk qrupunun həmsədr dövlətlərindən biri kimi fəaliyyət göstərib. Ayxan Hacızadənin şərhində vurğulandığı kimi, sual doğuran məqam ondan ibarətdir ki, Minsk qrupunun həmsədri olmuş ölkənin Prezidentinin köməkçisi dövlətinin bu məsələ ilə bağlı mövqeyini ya dərk etmir, ya da dərk etmək istəmir.
Rusiya-Ukrayna müharibəsini Qarabağda mövcud olmuş vəziyyətlə müqayisə etmək doğru deyil
V.Medinski öz statusuna uyğun olmayan bir tərzdə Rusiya-Ukrayna müharibəsini Qarabağda mövcud olmuş vəziyyətlə müqayisə edir. Belə paralellər aparmaq doğru deyil.
Azərbaycan heç bir qonşu dövlətə qarşı aqressiv müharibə aparmayıb. Respublikamızın apardığı müharibə ədalətli müharibə olub. Döyüşlər bizim ərazilərimizdə gedib. Məhz Azərbaycan Ordusunun qalibiyyəti sayəsində ölkəmizin ərazi bütövlüyü, suverenliyi təmin edilib. Çox doğru olaraq Azərbaycanın Zəfəri həm də beynəlxalq hüququn və tarixi ədalətin bərpası anlamında qəbul edilir. “Azərbaycan 2020-ci və 2023-cü illərdə öz suveren və beynəlxalq birlik tərəfindən tanınmış ərazilərində Vətən müharibəsi və antiterror tədbirləri həyata keçirib. 44 günlük Vətən müharibəsi və 1 gündən az olaraq davam etmiş 2023-cü il antiterror tədbirləri Azərbaycanın tam qələbəsi və Ermənistanın məğlubiyyəti ilə nəticələnib və beynəlxalq hüququn norma və prinsiplərinə uyğun olaraq erməni işğalına son qoyulub. Medinskiyə tövsiyəmiz odur ki, səlahiyyətinə aid olmayan məsələlərə dair yanlış iddialar səsləndirməklə dövlətlərarası münasibətlərə xələl gətirməsin”, - deyə Ayxan Hacızadə şərhində vurğulayıb.
Mübariz FEYİZLİ
