BAKI, 11 iyun. TELEQRAF
Donald Tramp administrasiyası (ABŞ) minlərlə qeyri-qanuni miqrantı müvafiq qurumlara xəbər vermədən Quantanamo həbs düşərgəsinə köçürməyi planlaşdırır.
Teleqraf xəbər verir ki, bu barədə “The Washington Post” məlumatlı mənbələrə istinadla bildirib.
Nəşrin yazdığına görə, qərar ən azı 9 min insana şamil olunacaq. Bu, Ukrayna, Böyük Britaniya, Fransa, İtaliya, Almaniya, Litva, Polşa, Haiti və digər ölkələrin vətəndaşlarına aiddir.
WP-yə danışan ABŞ rəsmilərinə görə, Vaşinqton müttəfiq dövlətlərin hökumətlərinə vətəndaşlarının Quantanamoya köçürülməsi barədə məlumat verməyi planlaşdırmır.
Artıq minlərlə miqrantın daşınma üçün yararlı olub-olmadığı yoxlanılır. Quantanamo həbsxanasının hazırda bu qədər insanı qəbul etmək imkanı yoxdur, nəşrin fikrincə, bu da orada yeni humanitar və siyasi böhran yarada bilər.
Nəşrin məlumatına görə, bu, Tramp administrasiyasının 2025-ci ilin əvvəlində Quantanamoya bir neçə yüz adam göndərildikdən sonra ilk belə qərardır. Plan hüquq müdafiəçiləri və diplomatik dairələrin narahatlığına səbəb olub.
