1991-ci ildə Azərbaycan xalqı uzun illər həsrətində olduğu müstəqilliyinə qovuşdu. Lakin bu müstəqillik ilkin mərhələdə dərin sınaqlarla üz-üzə qaldı. Daxili siyasi çəkişmələr, hakimiyyət böhranı, torpaqların işğalı və vətəndaş müharibəsi təhlükəsi dövlətçiliyimizi ciddi təhdid edirdi. Belə bir şəraitdə xalqın istəyi ilə 1993-cü il iyun ayında böyük siyasətə qayıdan Ulu Öndər Heydər Əliyev Azərbaycanı xilas edərək, sabitliyin və inkişafın əsasını qoydu. Məhz bu səbəbdən 15 iyun Azərbaycan tarixində Milli Qurtuluş Günü kimi əbədiləşdi.
1993-cü ilin iyununda ölkədə vəziyyət kritik idi. Gəncədə qaldırılan qiyam nəticəsində mərkəzi hakimiyyətin süqutu təhlükəsi yaranmış, Azərbaycan parçalanma və dağılma astanasına çatmışdı. Xalq bu xaotik vəziyyətdən çıxış yolunu yalnız təcrübəli və güclü liderin – Heydər Əliyevin yenidən hakimiyyətə qayıdışında görürdü. Nəticədə 15 iyun 1993-cü ildə Heydər Əliyev Azərbaycan Respublikası Ali Sovetinin sədri seçildi və bu tarix ölkənin siyasi tarixində dönüş nöqtəsinə çevrildi.
Heydər Əliyevin hakimiyyətə qayıdışı ilə ölkədə dövlət quruculuğu istiqamətində mühüm addımlar atıldı. İctimai-siyasi sabitlik bərpa olundu, ordu quruculuğuna başlanıldı, beynəlxalq əlaqələr genişləndi. 1994-cü ildə “Əsrin müqaviləsi” imzalanaraq Azərbaycanın enerji strategiyasının əsası qoyuldu. 1995-ci ildə isə müstəqil dövlətin ilk Konstitusiyası qəbul edildi. Bu, dövlətçilik tariximizdə böyük uğur idi.
Milli Qurtuluş Günü yalnız bir siyasi liderin hakimiyyətə qayıdışı deyil, həm də Azərbaycan xalqının öz taleyinə sahib çıxması, müstəqilliyini qorumaq iradəsini nümayiş etdirməsi deməkdir. Ulu Öndərin uzaqgörən siyasəti sayəsində Azərbaycan beynəlxalq aləmdə etibarlı tərəfdaş kimi tanınmağa başladı. Demokratik institutların yaradılması və hüquqi islahatlar nəticəsində müstəqillik daha da möhkəmləndi.
Bu gün Heydər Əliyev siyasəti Prezident İlham Əliyev tərəfindən uğurla davam etdirilir. 2020-ci ildə Qarabağ torpaqlarının işğaldan azad olunması, ərazi bütövlüyümüzün bərpası – məhz 1993-cü ildən başlanan güclü dövlətçilik yolunun məntiqi nəticəsidir. 15 iyun təkcə keçmişin deyil, həm də bu günün və gələcəyin qurtuluş tarixidir.
15 İyun – Milli Qurtuluş Günü Azərbaycanın dövlət müstəqilliyinin qorunub saxlanmasında və möhkəmlənməsində əvəzsiz rol oynamışdır. Bu gün gənc nəsil bu tarixi dərindən bilməli, Ulu Öndərin qoyduğu yolu dəyərləndirməli və müstəqil Azərbaycanın gələcəyinə sahib çıxmalıdır.
Əmrahov Faiq - partiya fəalı
