ABŞ prezidenti Donald Tramp təqribən iki həftə ərzində ölkələrə tarif dərəcələrini (gömrük rüsumları - red) ehtiva edən razılaşma məktubları göndərməyi planlaşdırdıqlarını açıqlayıb.
Marja xəbər verir ki, Tramp paytaxt Vaşinqtonda Kennedi Mərkəzinə daxil olarkən mətbuat mənsublarının suallarını cavablandırıb.
Ticarət danışıqları üçün son tarixi uzatmağı düşünüb-düşünmədiyi barədə suala Tramp belə cavab verib: “Mən istəyirəm, amma buna ehtiyacımız olacağını düşünmürəm”.
Çinlə "gözəl" bir müqavilə bağladıqlarını deyən Tramp, razılaşmadan çox məmnun olduqlarını və lazım olan hər şeyə sahib olduqlarını bildirib.
Daha əvvəl İngiltərə ilə ticarət müqaviləsi imzalandığını xatırladan Tramp, "Hazırda razılaşmalar baxımından çox yaxşı gedirik" deyib.
Tramp ölkələrə məktublar göndərəcəklərini deyib: "Budur müqavilə - qəbul edə də bilərsən, etməyə də. Məcburi deyil. Ölkələr ABŞ ilə ticarət aparmaq məcburiyyətində deyillər".
Bir çox ölkənin onlarla razılaşmaq istədiyini bildirən Tramp Yaponiya, Cənubi Koreya və bir çox başqa ölkə ilə danışıqlar apardıqlarını bildirib.
"Hazırda təxminən 15 ölkə ilə danışırıq, lakin bildiyiniz kimi, ümumilikdə 150-dən çox ölkə var və biz onların hamısı ilə danışa bilmərik. Beləliklə, təxminən bir həftə yarım, iki həftə ərzində bəzi ölkələrə məktublar göndərəcəyik və onlara razılaşmanın nədən ibarət olduğunu deyəcəyik", - Tramp bildirib.
