"Snapchat" çərşənbə günü “Snapchat+” xidmətinə daxil olan yeni “Lens+” abunə səviyyəsini istifadəyə verib.
Valyuta.az xəbər verir ki, aylıq 8,99 ABŞ dolları dəyərində olan bu paket istifadəçilərə eksklüziv obyektivlər və artırılmış reallıq (AR) təcrübələrinə çıxış imkanı yaradır.
Yeni səviyyə standart “Snapchat+” abunəsinin (aylıq 3,99 dollar) funksiyalarını da əhatə edir və yüzlərlə unikal obyektivlə “oynamaq, yaratmaq və paylaşmaq” imkanı təqdim edir. Şirkət bildirib ki, başlanğıc üçün bu obyektivlər “Snapchat” və seçilmiş yaradıcılar tərəfindən hazırlanacaq və hər həftə yeni AR təcrübələri əlavə olunacaq.
Şirkətin verdiyi məlumata görə, daha əvvəl pulsuz təqdim olunmuş obyektivlər ödənişli abunə arxasında gizlədilməyəcək. Gələcəkdə seçilmiş yaradıcılar eksklüziv obyektivlər vasitəsilə gəlir qazana biləcəklər. Lakin gəlir bölgüsü detalları hələlik açıqlanmayıb.
2022-ci ildən fəaliyyət göstərən “Snapchat+” artıq 14 milyondan çox abunəçiyə malikdir və şirkətin gəlir artımında mühüm rol oynayır. Aprel ayında “Snap” birinci rüb üzrə 1,36 milyard dollar gəlir əldə etdiyini və bunun əsas səbəblərindən birinin məhz bu abunə xidməti olduğunu açıqlayıb.
Bundan əlavə, reklamların deaktiv edildiyi və bütün digər abunə səviyyələrini əhatə edən aylıq 14,99 dollar dəyərində “Platinum Snapchat+” paketi də mövcuddur.
Sərvanə Rəmixanova
