Prezident yanında Antiinhisar və İstehlak Bazarına Nəzarət Dövlət Agentliyinin tabeliyində olan Azərbaycan Standartlaşdırma İnstitutu (AZSTAND) tərəfindən təsis edilən "Uyğunluğun qiymətləndirilməsi" standartlaşdırma üzrə Texniki Komitənin (AZSTAND/TK 08) növbəti iclası keçirilib.
İclasda AZSTAND-la yanaşı, Azərbaycan Respublikasının Kənd Təsərrüfatı Nazirliyi, “Bakı Metropoliteni” QSC, “SOCAR Downstream Management” MMC, “General Supply” QSC və digər qurumların nümayəndələri iştirak ediblər.
İclas zamanı AZSTAND TK-08-in fəaliyyət planına uyğun olaraq işlənib hazırlanan AZS ISO 20121 “Tədbirlərin dayanıqlılığının idarə edilməsi sistemləri – Tələblər və istifadə üzrə rəhbəredici göstərişlər”, AZS ISO 22003-1 “Qida təhlükəsizliyi - 1-ci hissə: Qida təhlükəsizliyini idarəetmə sistemlərinin auditini və sertifikatlaşdırılmasını həyata keçirən orqanlar üçün tələblər”, AZS 22300 “Təhlükəsizlik və davamlıq – Lüğət”, ISO 7101 “Səhiyyə Təşkilatının idarəedilməsi. Səhiyyə təşkilatlarında keyfiyyəti idarəetmə sistemi. Tələblər” və AZS ISO 37001 “Rüşvətxorluğa qarşı idarəetmə sistemləri. Tələblər və istifadəyə dair rəhbəredici göstərişlər” dövlət standartlarının layihələri müzakirə edilib.
İclasda həmçinin sözügedən Texniki Komitəyə məsul katibin seçilməsi və yeni üzvün qəbul olunması ilə bağlı səsvermə həyata keçirilib.
Yekunda Texniki Komitənin fəaliyyətinin təkmilləşdirilməsi məqsədilə üzvlərin təklif və tövsiyələri dinlənilib, o cümlədən konsensus əsasında qəbul edilən yeni standartların təsdiq üçün AZSTAND-a təqdim olunması ilə bağlı müvafiq qərarlar qəbul edilib.
