Yeni araşdırma nəticəsində məlum olub ki, ABŞ-ın ən sıx məskunlaşdığı 28 şəhərdə çökmə müşahidə olunur. Bura təkcə sahil şəhərləri deyil, həm də böyük daxili metropollar daxildir. Yüksək ayırdetmə qabiliyyətinə malik peyk məlumatlarına əsaslanan araşdırma nəticəsində müəyyən edilib ki, yer səviyyəsindəki dəyişiklik qeyri-bərabərdir.
Hafta.az-ın yazdığına görə, Hyuston ildə 5 mm-dən çox sürətlə batdığı halda, bəzi ərazilər ildə hətta 5 sm-ə qədər çökür. Oxşar tendensiyalar Dallas, Fort Uort, Las Vegas, Vaşinqton D.C və San Fransisko kimi şəhərlərdə müşahidə olunur.
Araşdırmaya görə, çökmənin 80 faizi yeraltı suların çəkilməsi ilə bağlıdır. Sulu təbəqələrdən, xüsusən də tərkibində qum və gil olanlardan su çəkilir, bu da təbəqələrin çökməsinə və səth səviyyəsinin aşağı düşməsinə səbəb olur. Texasda da vəziyyət neft və qaz hasilatı ilə daha da gərginləşir.
Nyu-York, Çikaqo və İndianapolis kimi bəzi şəhərlər hələ də tarixdən əvvəlki buzlaqların formalaşdırdığı yer qabığının hərəkətlərinin təsiri nəticəsində ildə 1-3 mm sürətlə çökməkdədir. Bundan əlavə, binaların öz çəkisi və yeni tikinti ilə yeraltı tikililərin pozulması da çökmədə rol oynaya bilər.
Tədqiqat göstərib ki, Nyu-York, Çikaqo, Los-Anceles, Feniks, Hyuston, Filadelfiya, San Antonio və Dallas şəhərlərinin 60 faizdən çoxu dağılma riski altındadır. Bu bölgələrdə 90-dan çox böyük daşqın hadisəsi baş verib. San Antonio və Ostin kimi şəhərlərdə hər 45-71 binadan biri ciddi çökmə və əyilmə riski altındadır.
