12 yaşlı Madden Forrest və onun 35 yaşlı atası Stiven Forrest 2024-cü ilin oktyabrından etibarən kart satışı ilə məşğul olaraq diqqətçəkici bir biznes qurublar.
Valyuta.az xəbər verir ki, onlar əvvəlcə "Pokémon", daha sonra isə futbol kartları ilə ticarətə başlayıblar və bu məhsulları "TikTok" və digər sosial media platformalarında canlı yayımlarla təqdim edərək sürətlə müştəri bazası yaradıblar.
Ailənin qurduğu "Bull Island Breaks" adlı şirkət artıq minlərlə dollarlıq aylıq gəlir gətirir. May ayında bu məbləğ 49 000 ABŞ dollarına (83 300 manat) çatıb, iyun üçün isə hədəf 65 000 dollardır (110 500 manat). Onların qazancı əsasən eksklüziv və nadir kart paketlərinin maya dəyərindən qat-qat yüksək qiymətə satılmasından irəli gəlir. Məsələn, 120 dollara (204 manata) alınan bir paket 400–450 dollar (680-765 manat) aralığında satılır.
Uğurlarının əsas səbəblərindən biri bazardakı boşluğu düzgün qiymətləndirərək ona uyğun strateji addımlar atmaqlarıdır. Madden kartların seçimi və təqdimatı ilə məşğul olur, atası isə yayım və satış işlərini koordinasiya edir. Hər axşam saat 19:00-da başlayan canlı yayımlar zamanı futbol kartları ən çox maraq görən kateqoriya hesab olunur.
Bununla yanaşı, onların fəaliyyəti bir sıra risklərlə də üzləşib. Məsələn, "TikTok" platformasında bir kartın səhvən yenidən öz komandalarına satılması səbəbilə hesabları müvəqqəti bloklanıb və bu, biznesin təqdimat və platforma qaydalarına uyğunluğunun nə qədər vacib olduğunu göstərib.
Madden qazancını avtomobil almaq, təhsilini davam etdirmək və gələcəkdə yaşadığı şəhərdə öz kart mağazasını açmaq üçün planlaşdırır. Bu nümunə bir daha sübut edir ki, doğru analiz, sosial media strategiyası və bazar dinamikasına uyğun qərarlarla gənc sahibkarlar da uğurlu iqtisadi layihələr həyata keçirə bilərlər.
Mayya Hüseynova
