İnformasiya Texnologiyaları üzrə mühəndis-tədqiqatçı, Azərbaycan Kibertəhlükəsizlik Təşkilatları Assosiasiyasının (AKTA) eksperti Bəhruz Əliyev isə saytımıza açıqlamasında “fintech” və rəqəmsal kredit şirkətlərinin (maliyyə qurumları və s.) istifadəçilər üçün rahatlıq yaratdığı qədər, müəyyən risklərinin də olduğunu söyləyib: “İnsanların kart və şəxsiyyət məlumatlarının oğurlanması, ən ciddi problemlərdəndir. Fişinq, “malware”, zəif şifrələmə və zəif autentifikasiya sistemləri ilə bu məlumatlar ələ keçirilə bilər. Əgər kredit şirkəti məlumatları yaxşı şifrələmirsə və ya məlumat bazasını mütəmadi qorumaq üçün tədbir görmürsə, istifadəçilər üçün təhlükə yarana bilər. Bəzi saxta tətbiqlər "kredit verirəm" adı ilə məlumat toplayıb sonradan dələduzluq məqsədilə istifadə edə bilər. Fırıldaqçılar istifadəçi razılığı olmadan məlumatları üçüncü tərəfə ötürülə bilər”. 
Ekspert rəqəmsal kredit alarkən diqqət ediləsi məsələlərlə bağlı da tövsiyə verib: “Yalnız Mərkəzi Bank tərəfindən nəzarət olunan və rəsmi lisenziyaya malik şirkətlərdən (maliyyə qurumlarından) kredit götürmək tövsiyyə olunur. İki faktorlu autentifikasiya (2FA) tələb edən platformaları üstün tutun. Kart məlumatlarını birbaşa tətbiqə daxil etmədən əvvəl onun rəsmi mənbədən yükləndiyinə əmin olun. Məlumat icazələrini nəzərdən keçirin. Tətbiq sizdən kontakta, kameraya, fayllara icazə istəyirsə, bu potensial təhlükə ola bilər. Məqsədi dəqiq aydınlaşdırıb sonra ehtiyac varsa, icazə verin”. B.Əliyev qeyd edib ki, onlayn kredit alışı potensial təhlükə daşıyır, lakin doğru platforma və təhlükəsizlik vərdişləri ilə bu risklər minimuma endirilə bilər. Problem ondan qaynaqlanır ki, bir çox istifadəçi rahatlıq naminə təhlükəsizliyə laqeyd yanaşır. Sevinc İbrahimzadə / Metbuat.az
