Əksəriyyət pişikləri sakit və hər şeyə laqeyd ev heyvanları kimi qəbul etsə də, əslində onların da insanlarınki kimi narahatlıq və stres yaşaya bilən həssas sinir sistemi var.
HİT.az xəbər verir ki, ABŞ-ın "PetHelpful" platformasının ekspertləri pişiklərdə stressin beş əsas əlamətini müəyyənləşdirib.
1. Tualetdən kənarda ifrazat
Əgər pişiyiniz qəfildən qumu yerinə yatağa, paltarlara və ya divana sidik edir və ya nəcis buraxırsa, bu, onun narahatlıq keçirdiyinə işarədir. Çox vaxt bu davranış səhvən "kinli hərəkət" kimi dəyərləndirilir, lakin əslində pişik bu üsulla sizə bir şeyin yolunda getmədiyini anlatmağa çalışır.
Stresi yaradan səbəblərə yeni insan və ya heyvanın evə gəlməsi, təmir işləri, digər heyvanlarla konflikt və ya tualet qumunun çirkli və ya əlçatmaz olması daxildir.
2. Həddindən artıq yalanma
Pişiklər normal gigiyena üçün özlərini yalayarlar, amma bu davranış həddini aşarsa, bu artıq özünü sakitləşdirmə cəhdidir. Bu vəziyyət psixogen alopesiya adlanır və stres, frustrasiya və sosial gərginliklə bağlı olur. Yalanmanın nəticəsində tüklər tökülə bilər və dəridə zədələnmələr meydana çıxar.
Bu davranış xüsusilə digər pişiklərlə birgə yaşayan və əsas ehtiyacları tam ödənməyən heyvanlarda müşahidə olunur.
3. Mebelləri cırmaq
Pişiklərin mebelləri cırması yalnız pəncələrini itiləmək deyil, eyni zamanda stress və narazılıq əlamətidir. Əgər pişiyiniz evdə konkret bir otaqda və ya müəyyən şəxsin əşyasında cırmaq davranışı göstərirsə, bu, onun həmin şəxs və ya məkanla bağlı narahatlıq hiss etdiyini göstərə bilər.
4. Yuxu rejimində dəyişikliklər
Stresli pişik ya daha az, ya da əksinə, daha çox yatmağa başlayır. Məsələn, köç zamanı və ya yeni mühitdə səs-küy artdıqda pişiklər daha az yataraq daha ayıq qalırlar. Uzunmüddətli stress isə əksinə, fəaliyyəti azaldaraq depressiv yuxulu vəziyyət yarada bilər.
Bu cür dəyişikliklərə diqqət yetirilməlidir, çünki onlar həm fiziki, həm də psixoloji problemlərin göstəricisi ola bilər.
5. İştahın azalması
İştahın qəfil azalması pişiklər üçün xüsusilə təhlükəlidir. Çünki bu, qaraciyər lipidizasiyası adlı ölümcül xəstəliyə yol aça bilər. Bu vəziyyətdə pişiyin qaraciyəri yağ ehtiyatlarını parçalamağa çalışır, amma bu yağlar düzgün parçalanmadığından qaraciyərdə yığılıb qalır və onun funksiyasını poza bilər.
Piylənməyə meylli pişiklərdə bu risk daha yüksəkdir.
Nə etmək olar?
* Pişiyiniz üçün sakit və təhlükəsiz sığınacaqlar yaradın: məsələn, yüksək oturacaq yerləri, gizlənmək üçün qutular, sakit otaqlar.
* Onunla sakit və ardıcıl münasibət qurun.
* Əgər davranışlar uzun müddət davam edərsə, veterinar davranış mütəxəssisinə müraciət edin.
Samir
