Honq Konqun rəsmiləri Tayvan mərkəzli hazırlanmış video oyununun regiondakı rəqəmsal platformalardan çıxarılması və vətəndaşların endirməməsi barədə xəbərdarlıq edib. Oyun, "parçalanma" və "silahlı inqilab" mövzuları səbəbilə təhlükəsizlik qanunları çərçivəsində yoxlanılaq altına alınıb.
HİT.az xəbər verir ki, Honq Konq rəsmiləri Tayvan mərkəzli ESC Taiwan qrupu tərəfindən hazırlanan "Reversed Front: Bonfire" adlı mobil oyunun vətəndaşlar tərəfindən endirilməməsi barədə diqqətçəkən bir xəbərdarlıq yayıb. Xəbərdarlıqda göstərilən səbəb kimi oyunun silahlı inqilabı təşviq etdiyi və Tayvanla Honq Konqun müstəqilliyini müdafiə edən parçalanma fikirlərini yaydığı irəli sürülür.
Honq Konq rəhbərliyi bu cür qadağa üçün ilk dəfə Çinin milli təhlükəsizlik qanunlarına istinad edib. 2024-cü ildə Honq Konqda qüvvəyə minən yeni yerli təhlükəsizlik qanunları ilə Çin ana qitəsindəki milli qanunvericiliyin birləşməsindən ibarət olan hüquqi çərçivə, internet xidmət provayderlərindən tətbiq platformalarınadək çoxlu rəqəmsal quruluşları hökumət tələblərinə tabe olmağa məcbur edir. Bu yaxınlarda bənzər bir addım keçən aylarda "Honq Konqa Şöhrət" adlı etiraz mahnısının regiondakı rəqəmsal girişinin bloklanması üçün "Google"a edilən tələblərlə gündəmə gəlmişdi.
"Reversed Front: Bonfire" Çin Kommunist Partiyasına açıq-aşkar qarşı mövqe tutan "ESC Taiwan" tərəfindən hazırlanıb. Rəsmilərin açıqlamasından dərhal sonra oyun Honq Konqdakı Apple App Store-dan 24 saat ərzində çıxarılıb. Eynilə, "Google" da oyunu may ayında "Play Store"dan çıxarmışdı.
"ESC Taiwan" komandası isə tətbiqin çıxarılmasını Çin ana qitəsində tətbiq olunan senzuranın əksi kimi qiymətləndirib. Qrup həmçinin sosial mediada rəsmilərə oyunun populyarlığını artırdığı və axtarış statistikasında sıçrayışa səbəb olduğu üçün istehzalı bir təşəkkür mesajı da göndərib.
Anime stilində qrafikaların ön plana çıxdığı oyunda oyunçular Çin Kommunist Partiyasına qarşı mübarizə aparan Honq Konq, Tayvan, Tibet, Monqolustan və Uyğurların yaşadığı Şincandan olan personajları canlandıra bilir. Oyun təbliğatçı, tərəfdar, casus və ya partizan kimi müxtəlif rolları oynamaq imkanı təqdim edir, istəyənlər isə hökumət əsgərləri tərəfində də yer ala bilər.
Honq Konq Polisi oyunun yayılmasının qarşısını almaq üçün olduqca sərt xəbərdarlıqlar edib. İnternetdə oyunu paylaşan və ya tövsiyə edən hər kəsin "parçalanmanı təhrik etmək", "hökuməti devirməyə təşviq etmək" və "üsyan məqsədli cinayətlərdə iştirak etmək" kimi ittihamlarla üzləşə biləcəyi bildirilib. Oyunu endirən şəxslər "üsyançı nəşriyyatı saxlamaq" ittihamı ilə hüquqi təqibə məruz qala bilər, oyuna maliyyə dəstəyi göstərənlər isə milli təhlükəsizlik qanunlarını pozduğu üçün cəzalandırıla bilər. Rəsmilər "Bu tətbiqi endirənlər onu cihazlarından dərhal silməli və qanuna qarşı gəlməkdən çəkinməlidir" şəklində aydın xəbərdarlıq edib.
Samir
