Bir çox insan biznesə başlamaq istəyir, lakin lazım olan ilkin kapitalı toplamadan xərc etməyə başlayır və nəticədə eyni mərhələdə ilişib qalır. Uğurlu sahibkarların çoxu etiraf edir ki, ilkin mərhələ ən çətinidir. Pulun az, riskin çox, təcrübənin isə yetərsiz olduğu bu mərhələni keçmək, əslində sahibkarlığın dözümlülük testidir. Bəs uğurlu biznesmenlər bu mərhələni necə aşırlar?
Valyuta.az aşağıda uğur qazanmış iş adamlarının təcrübəsinə əsaslanan 5 əsas strategiyanı təqdim edir.
1. Gəlirdən əvvəl qənaət düşüncəsi
Əksər biznesmenlər öz uğur yolunun ilk addımında xərcləri minimallaşdırmaq strategiyasına üstünlük veriblər. Warren Buffett-in məşhur fikri var: “Pul yığmaq üçün gəliri artırmağa deyil, xərci azaltmağa fokuslan.”
Uğurlu sahibkarların çoxu ilk illərdə özlərinə maaş yazmayıb, şəxsi xərclərini minimuma endirib. Bu davranış modeli kapitalın yığılması üçün vacib ilkin təkan rolunu oynayır. Bəziləri isə şəxsi həyat tərzini tamamilə sadələşdirərək, hər ay gəlirin böyük hissəsini biznesə yönəldib.
2. Kiçik, amma çevik iş modelləri seçmək
İlk mərhələdə böyük və bahalı biznesə girmək əksər hallarda iflasa gətirib çıxarır. Əvəzində, çevik və az maliyyə tələb edən modellər uğur şansını artırır. Məsələn, xidmət əsaslı modellər - marketinq, dizayn, tərcümə, onlayn konsultasiya, və ya rəqəmsal məhsul satışları ilk kapitalı yaratmaq üçün daha əlverişlidir.
3. Təkrar investisiya prinsipi
Kapital yığmaq istəyən bir çox biznesmen qazandıqlarını şəxsi xərclərə deyil, yenidən biznesə yatırmağa üstünlük verir. Bu, həm böyüməni sürətləndirir, həm də kənar sərmayəyə ehtiyacı azaldır. Məsələn, satışdan 1000 manat qazanan gənc sahibkar onu reklam, stok artırımı və ya avtomatlaşdırmaya sərf edir. Nəticədə gəlir dairəsi genişlənir və yığılmış məbləğ daha sürətli formalaşır. İlk 100 minə gedən yolun sürətlənməsi də məhz buradan başlayır.
4. Dəyərləndirmə deyil, nağd axın ön planda
Yeni başlayanların buraxdığı ən böyük səhv gələcək dəyərək fokuslanmaq, lakin bugünkü nağd axını gözardı etməkdir. Kapital toplamaq istəyən sahibkar isə gəliri ertələmədən, sabit və real pul dövriyyəsinə üstünlük verir. Müvəqqəti olaraq yüksək marjalı, az xərcli və dövriyyəsi sürətli məhsul və xidmətlər seçilir. Məqsəd ilk 10 min, 50 min, 100 min manatın kassaya fiziki olaraq daxil olmasıdır. Dəyər artımı və markalaşma isə sonrakı mərhələnin işidir.
5. Pul qazanmaq yox, dəyər yaratmaq düşüncəsi
Bütün uğurlu biznesmenlər bu fikir ətrafında razılaşır: kapital birbaşa pul qazanmaqla deyil, faydalı məhsul və xidmət yaratmaqla formalaşır. Jeff Bezos-un ilk prinsipi belə idi: “Əgər müştəriyə həqiqi dəyər təqdim etsən, gəlir onsuz da gələcək.” Dəyər yaradan yanaşma sahibkarı həm bazarda, həm investor qarşısında, həm də müştəri gözündə fərqləndirir. Dəyər artdıqca gəlir artmağa başlayır və kapital özü-özünü böyütməyə başlayır.
