İllərdir ki, çay süfrələrinin, kinoya axşamlarının və bəzən də boş vaxtın “yoldaşı” olan günəbaxan tumu əslində düşündüyümüzdən daha çox şey vəd edir. Bir çox insan üçün bu, sadəcə vərdiş və ya əyləncə vasitəsidir. Amma bir ovuc günəbaxan tumu (semiçka) əslində orqanizm üçün bir dəstə vitamin və mineralla dolu bir təbii dərmandır. Xüsusilə də düzgün miqdarda və qabığı ilə yox, içliyini yeyərək qəbul edilərsə, həm ağ, həm də qara günəbaxan tumu sağlamlıq üçün əvəzsiz faydalar verir.
Bəs bu tumların ağ və qarası arasında nə fərq var? Hansı daha faydalıdır?
Yenisabah.az günəbaxan tumunun faydalarını təqdim edir:
Qara günəbaxan tumunun faydaları
Qara günəbaxan tumu daha yağlı və ləzzətli olur. Onun tərkibindəki qidalar, xüsusilə də E vitamini, magnezium, selen, sink və B qrupu vitaminləri immuniteti gücləndirir, ürək-damar sistemini qoruyur.
Əsas faydaları bunlardır:
-
Antioksidant təsiri: Qara tumdakı E vitamini və selen hüceyrələri sərbəst radikallardan qoruyur.
-
Ürək sağlamlığı: Omeqa-6 yağ turşuları və fitosterollar pis xolesterolu azaldaraq ürək-damar sistemini dəstəkləyir.
-
Sinir sistemi üçün faydalı: B1 vitamini (tiamin) sinir sisteminin fəaliyyətini yaxşılaşdırır.
-
Dəri və saç üçün gücləndirici: Tumun tərkibindəki yağlar və vitaminlər dəri hüceyrələrinin bərpasını sürətləndirir.
Ağ günəbaxan tumunun faydaları
Ağ günəbaxan tumu daha az yağlıdır və bəzən "diyetik semiçka" kimi təqdim olunur. Həm görünüşcə, həm dad baxımından fərqlidir. Onun tərkibi də zəngindir, amma daha balanslı yağ tərkibinə malikdir. Qara tumla müqayisədə daha az kalori qəbul etmək istəyənlər üçün uyğun variantdır.
Faydaları arasında:
-
Qaraciyər və böyrək funksiyalarına müsbət təsir: Dərmansız detoks effekti verir.
-
Zəif yağ tərkibi sayəsində pəhrizlərə uyğun: Çəkisinə diqqət edənlər üçün idealdır.
-
Həzm sistemini yaxşılaşdırır: Lif tərkibi bağırsaqların fəaliyyətini tənzimləyir.
-
İltihabəleyhinə təsir: Tərkibindəki bəzi bioaktiv maddələr orqanizmdə iltihabı azalda bilir.
Hansı daha faydalıdır?
Bu, ehtiyaca görə dəyişir. Məsələn, enerji ehtiyacı yüksək olanlar və fiziki fəaliyyətlə məşğul olanlar üçün qara tum daha uyğundur. Pəhriz saxlayanlar və az yağlı qidalananlar isə ağ tumu üstün tuta bilərlər.
Əsas məsələ miqdardır – gündə 30-50 qram tum kifayətdir. Lakin qabıqlı semiçkanı dişlə qıraraq yemək diş minasına zərər, çənə oynaqlarına təzyiq və dodaq-dil yaraları yarada bilər. Buna görə qabıqsız tum və ya evdə təmizlənmiş forması tövsiyə olunur.
Dietoloqlar deyirlər ki, günəbaxan tumu sərhəd tanımayan qəlyanaltı olmamalıdır. Xüsusilə də duzlu və ya çox qızardılmış tumlar təzyiqi və böyrəkləri yora bilər. Ən faydalısı duzsuz, çiy və ya az qovrulmuş formasıdır.
Semiçka sadəcə vaxt keçirtmək üçün yox, həm də sağlamlıq üçün faydalı bir qəlyanaltıdır. Amma hər şeydə olduğu kimi bunda da ölçü vacibdir. Əgər vərdişinizi bir az dəyişdirib keyfiyyətli tum seçsəniz və gündə bir ovucla kifayətlənsəniz, bu kiçik tumların böyük faydasını hiss edəcəksiniz.
Əsmətxanım
Telegram kanalımız
