Bakıda dələduzluqda təqsirləndirilən Sahib Mahmudovun barəsindəki qərardan kassasiya şikayəti verilib.
Pravda.az-ın əldə etdiyi məlumata görə, şikayət Ali Məhkəmədə araşdırılacaq.
İttihama görə, Sahib Mahmudov Bakı şəhərində tikinti sahəsində fəaliyyət göstərən İran vətəndaşı, zərərçəkmiş Asghar Razzaghiyə özünü daşınmaz əmlak alqı-satqısı və sənədləşməsi işləri ilə məşğul olan və bu sahədə geniş əlaqələrə malik olan şəxs kimi təqdim edib.
Belə ki, zərərçəkmiş şəxs ona gələcəkdə bina inşa etmək üçün torpaq sahəsi almaq istədiyini bildirib. O, bu məsələdə özünün yaxından köməklik göstərə biləcəyini deyərək Bakı şəhəri ərazisində bir neçə ünvanda boş torpaq sahələrini, o cümlədən paytaxt ərazisindəki şose yolunun kənarında yerləşən və yaşıllıq ərazisi hesab edilən 600 kvadrat metr torpaq sahəsini göstərib. Sahib guya sonuncu torpaq sahəsinin özünə məxsus olduğunu deyərək Asghar Razzaghiyə yalan məlumat verib. O, 02 iyul 2010-cu il tarixdən 19 mart 2013-cü il tarixədək olan müddət ərzində ayrı-ayrı zərərçəkmiş şəxsin ümumilikdə 304 000 manat pulunu dələduzluq yolu ilə ələ keçirib.
Bundan başqa, Sahib Mahmudov ali tibb təhsilini xaricdə davam etdirmək istəyən Azərbaycan Tibb Universitetinin tələbəsi, zərərçəkmiş Namiq Məmmədzadəyə (şərti) yalandan özünü hüquqşünas kimi təqdim edərək dövlət xətti ilə xaricdə təhsil alınması ilə bağlı hüquqi məsələlərin tənzimlənməsində təcrübəsinin və bu sahədə geniş əlaqələrinin olduğunu bildirib. O, 2017-ci ildə bu yolla tələbədən ümumilikdə 7 000 manat pul alaraq dələduzluq edib.
Sahib Mahmudov daha bir zərərçəkmişin 4200 manat pulunu dələduzluq yolu ilə alıb. Guya o, həmin şəxsə pensiya düzəltdirəcəkmiş.
Bakı Ağır Cinayətlər Məhkəməsinin hökmü ilə o, 3 il müddətinə azadlığın məhdudlaşdırılması (elektron qolbaq) cəzasına məhkum edilib. Ali Məhkəmə isə protest və şikayəti təmin etməyib.
Kamal Məmmədov
