Keyfiyyətli və dərin yuxu sağlam həyatın əsas şərtlərindən biridir.
Pravda.az yuxuya getməkdə çətinlik çəkənlər üçün bəzi qidaları təqdim edir:
Melatonin və triptofan kimi maddələrlə zəngin olan təbii qidalar orqanizmi rahatlaşdıraraq yuxuya keçidi asanlaşdırır.
Banan - Kalium və melatoninlə zəngin olan banan bədəni sakitləşdirir. Gecə yatmazdan əvvəl yarım ədəd banan yemək dərin və rahat yuxuya keçid üçün faydalıdır.
Yulaf – Liflə zəngin olan yulaf melatoninin ifrazını dəstəkləyir. Axşam saatlarında yulaf yemək yuxuya getməni asanlaşdırır.
Süd – İlıq süd tərkibindəki amin turşuları sayəsində bədəni rahatlaşdırır və yuxunun keyfiyyətini artırır.
Çobanyastığı çayı – Təbii sakitləşdirici təsirə malik bu bitki çayı dərin və sakit yuxuya keçidi dəstəkləyir.
Qatıq – Triptofanla zəngin olan qatıq az yağlı formada qəbul edildikdə rahat yuxunu təmin edir.
Düyü – Az yağlı şəkildə bişirilmiş düyü yeməkləri qatıqla birlikdə yeyildikdə orqanizmi yuxuya hazır vəziyyətə gətirir.
Tam taxıllı çörək – Taxıllı çörək və ayranla birlikdə qəbul edilən yüngül yemək dərin və rahat yuxunun açarı ola bilər.
Qoz – Melatoninin ifrazını artıran qoz bədənin yuxuya keçid prosesini sürətləndirir və fasiləsiz yuxunu dəstəkləyir.
Badam – Zülal və minerallarla zəngin olan badam yatmazdan əvvəl yeyildikdə orqanizmi sakitləşdirir və yuxuya keçidi asanlaşdırır.
Qeyd: Dərin və rahat yuxu problemi yaşayanlara bu təbii qidaları gündəlik rasionlarına daxil etmələri tövsiyə olunur.
Əminə Bayramova
