Oxu.az saytına istinadən ain.az xəbər verir.
"UVB-76" "Qiyamət günü" radiostansiyası İsrailin İrana zərbə endirməsindən əvvəl yeni mesajlar yayımlayıb.
Oxu.Az-ın xəbərinə görə, bu barədə "UVB-76 loqi" "Telegram" kanalı məlumat verib.
Məlumata görə, iyunun 12-də, Moskva vaxtı ilə saat 15:14-də (Bakı vaxtı ilə 16:14-də) radiostansiyanın efirində "NJTİ 22345 TKAÇOSAP 8394 7873" mesajı səslənib.
Xatırladaq ki, bundan əvvəl "Qiyamət günü" radiostansiyası iki yeni sirli mesaj yayımlamışdı. İyunun 4-də saat 19:51-də "Azotobask" və "Oşolin" sözlərini səsləndirmişdi.
Mayın 22-də isə "bezlobie" sözü, ardınca da "xryukostyaq" sözü yayımlanmışdı.
Qeyd edək ki, "UVB-76" daimi şəkildə monoton "vızıltı" səsi yayımlaması ilə tanınır və bəzən bu, anlaşılmaz ifadələr, rəqəmlər və ya mənasız söz ardıcıllığı ilə müşayiət olunur. Radiostansiyanın Rusiya Silahlı Qüvvələrinə aid olduğu güman edilir, lakin onun məqsədi barədə dəqiq heç nə məlum deyil.
Belə bir fikir də var ki, bu stansiya SSRİ-də soyuq müharibə illərində hazırlanmış "Perimetr" sistemi ilə əlaqəlidir. Bu sistemi isə ABŞ-də "Ölü əl" adlandırırlar. O, kommunikasiyaların pozulması halında kütləvi nüvə cavab zərbəsini avtomatik idarə etmək üçün nəzərdə tutulub. "Perimetr" baş qərargahdan verilən əməliyyat əmrlərinin idarəetmə mərkəzlərinə və döyüşə hazırlıq vəziyyətində olan fərdi raket buraxılış qurğularına etibarlı şəkildə çatdırılmasını təmin edir.
Bəzi qeyri-adi ifadələr hərbi məqsədlər üçün rabitə vasitəsi kimi istifadə edilə bilər. Fərziyyə var ki, səsli mesajların əsas məqsədi şəxsi heyətin nüvə sualtı qayıqları kimi hədəf obyektlərinə döyüş hazırlığını təsdiq etməkdir.
Həmçinin radiosiqnalların astronomik rəsədxanalarda istifadə üçün nəzərdə tutulmuş ola biləcəyi də düşünülür, hansı ki, ionosferdəki dəyişiklikləri təhlil edir və ya hətta yerdənkənar sivilizasiyalarla əlaqə yaratmaq üçün tətbiq edilir. Lakin bu çox sayda nəzəriyyələrin heç biri etibarlı faktlarla təsdiqlənməyib.
Raketlərlə bağlı versiya səbəbindən "Buzzer"i həm də "Qiyamət günü" radiostansiyası adlandırırlar: guya o, nüvə münaqişəsi zamanı qərar verən şəxslərin ölümü halında raketlərin buraxılması üçün olan siqnalın avtomatik ötürülməsi üçün nəzərdə tutulub.
Stansiyanın dəqiq yeri hələ də tam şəkildə müəyyən edilməyib. Əvvəlcə onun Qərb hərbi dairəsində, Moskva vilayətinin Povarovo kəndi yaxınlığında yerləşdiyi güman edilirdi, sonra Leninqrad vilayətinin Kerro kəndinə köçürüldüyü və hazırda Naro-Fominskdən fəaliyyət göstərdiyi ehtimal edilir.
Hadisənin gedişatını izləmək üçün ain.az saytında ən son yeniliklərə baxın.
