BAKI, TurkicWorld
Avropa Parlamenti İsrailin İrana hücumunu pisləməkdən imtina edib.
TurkicWorld xəbər verir ki, Belçikalı Avropa Parlamentinin üzvü Mark Botenqa Sol Qrup adından Avropa Parlamentinin Baş Assambleyasına İsrailin İrana qeyri-qanuni hücumunu pisləyən qətnamə təklif etsə də, əsas partiyaların buna qarşı çıxması nəticəsində səsvermə keçirilməyib.
“Rusiya Ukraynaya qanunsuz hücum edəndə onu qınayırlar, amma İsrail İrana qeyri-qanuni hücum etdikdə Avropa Parlamenti bunu pisləməkdən imtina edir.” - deyə Botenqa çıxışında vurğulayıb. O əlavə edib ki, İsrailin son hücumları mülki insanlara, o cümlədən uşaqlara zərər vurub, nüvə obyektləri isə qəsdən hədəfə alınıb.
“Biz bu məsələ ilə bağlı AP-də səsvermənin keçirilməsini istədik, çünki heç bir dövlət başqa ölkəyə hücum edə bilməz. İsrail bunu tez-tez edir, lakin bu, qanunsuz və cinayət xarakterlidir.”- deyə o vurğulayıb.
Botenqa həmçinin AB-nin Rusiyanı tənqid etdiyi kimi İsraili də qınamasını tələb edib və AB Komissiyasının sədri Ursula von der Leyenin İsrailin özünümüdafiə hüququnu müdafiə etməsini sərt şəkildə tənqid edib:.
O, Tehranla bağlı vəziyyətin “Qəzzaya çevrilməməsi” üçün Avropa Parlamentinin qətnamə qəbul etməsinin vacibliyini vurğulayıb və “Beynəlxalq hüquqa zidd olan cinayətləri pisləmədən insan haqlarının müdafiəsi mümkün deyil.” - deyə qeyd edib.
İclasdan sonra sosial şəbəkələrdə açıqlama verən Botenqa, əsas partiyaların İsrailin İrana hücumunu pisləyən təklifi müzakirəyə belə qoymadığını bildirib.
