Florensiyadakı Uffizi Qalereyasında 18-ci əsrə aid çox qiymətli bir tablo selfi çəkmək istəyən turistin ayağının sürüşməsi nəticəsində zədələnib.
Kulis.az xəbər verir ki, italyan barokko rəssamı Anton Domeniko Gabbianinin təxminən 1695–1700-cü illərə aid olan “Toskana Böyük Şahzadəsi Ferdinando de’ Medici” portretinin qarşısında ziyarətçiləri məsafədə saxlamaq üçün qoyulmuş platformaya ilişən turist tabloya bir dəlik salıb. Hadisə anına dair görüntülər yerli və sosial mediada yayılıb.
Tablo bərpa üçün sərgidən çıxarılıb. Sərgi 2 iyul tarixinə qədər bağlı qalacaq, daha sonra 28 noyabra qədər planlaşdırıldığı kimi davam edəcək.Uffizi Qalereyalarının direktoru Simone Verde deyib: “Yalnız sosial şəbəkələr üçün selfi çəkməyə gələn ziyarətçilər problemi artıq çox yayılıb. Mədəniyyət irsinə hörmətlə uyğun gəlməyən davranışların qarşısını almaq üçün müəssisələrimiz çox sərt qaydalar tətbiq edəcək.”
Qeyd edək ki, turistin kimliyi müəyyən edilib və ona qarşı məhkəmə iddiası açılacağı bildirilib.
