Polşanın xarici işlər naziri Radoslav Sikorski hesab edir ki, yeni silahlanma yarışı Vladimir Putin rejiminin süqutuna gətirib çıxara bilər — necə ki, vaxtilə bu, Sovet İttifaqının başına gəlib.
Moderator.az "TSN"-ə istinadla xəbər verir ki, baş diplomat bu barədə "NTV" tərəfindən sitat gətirilən bir müsahibəsində bildirib.
Sikorskinin sözlərinə görə, Kreml Ukraynaya qarşı çox bahalı bir müharibə aparır və eyni zamanda Qərbi təhdid edir. Bu səbəbdən Qərb də öz müdafiəsinə daha çox vəsait ayırmaq məcburiyyətində qalır.
“Putin başa düşməlidir ki, o, Brejnev yolu ilə gedir. O özü vaxtilə demişdi ki, Sovet İttifaqı çox silahlandığı üçün dağıldı. İndi o, eyni şeyi edir,” – deyə Sikorski vurğulayıb.
Nazir əlavə edib ki, “Texas ölçüsündə bir iqtisadiyyatdan Putin daha da çox müdafiə xərcləri çıxarmalı olacaq. Ümid edirik ki, nəticə rejim üçün eyni olacaq – amma daha tez.”
Silahlanma yarışı: tarixdən alınan dərslər...
Qərblə Rusiya arasında strateji rəqabətin kəskinləşməsi Ukraynaya qarşı tammiqyaslı işğaldan sonra daha da sürətlənib. Bu rəqabət nüvə, hipersəsli, kibersilahlar və dron texnologiyalarını da əhatə edir. Soyuq müharibə dövründə olduğu kimi, yeni silahlanma yarışı da iqtisadiyyatları tükəndirir.
Qeyd edilib ki, Rusiya bank sistemi ciddi böhran astanasındadır. Ekspertlərin proqnozuna görə, əgər iqtisadi vəziyyət yaxşılaşmasa, 2026-cı ilin aprelində bank sektoru çökə bilər. Əsas səbəb – müştərilərin qaytara bilmədiyi “pis kreditlərin” sürətlə artmasıdır.
