Azpolitika.az portalından verilən məlumata görə, ain.az xəbər yayır.
Ermənistanın keçmiş prezidenti Serj Sarqsyana qarşı rüşvət alma və sahibkarlıqda qanunsuz fəaliyyət ittihamı irəli sürülüb.
Bu barədə “Report” erməni KİV-lərinə istinadən xəbər verir.
Məlumata görə, ilkin istintaqı Ermənistanın Antikorrupsiya Komitəsi aparır. İstintaq müəyyən edib ki, Sarqsyan 2000-2018-ci illərdə Ermənistanın müdafiə naziri, baş nazir və prezidenti vəzifələrində olarkən, etibar etdiyi şəxslər vasitəsilə sahibkarlıq fəaliyyəti ilə məşğul olan təşkilatlar yaratmaq və kommersiya təşkilatlarının idarə edilməsində iştirak etmək üçün vəzifə səlahiyyətlərindən istifadə edib.
Bununla da o, özü ilə sıx əlaqədə olan müəyyən M.B.-nin və ona məxsus təşkilatların Ararat vilayətinin Surenavan icmasında bitum zavodunun əsasının qoyulmasına cəlb edilməsinə kömək edib.
Planın həyata keçirilməsi üçün Sarqsyanın etibar etdiyi şəxs - M.B.-nin iştirakı ilə fəaliyyət göstərən şirkət, Kipr Respublikasında qeydiyyatdan keçmiş iki Rusiya şirkəti ilə birlikdə 20 fevral 2006-cı ildə yeni bir şirkət təsis edib. Sarqsyan M.B. vasitəsilə yuxarıda göstərilən şirkətin təsis edilməsində və idarə edilməsində iştirak edərək, bu şirkətin səhmlərinin 50%-nin M.B.-yə məxsus şirkətin adına, qalan 50% səhmlərin isə iki Rusiya şirkətinin mülkiyyət hüququna qeydiyyata alınmasını tapşırıb.
Daha sonra o, M.B.-dən yeni yaradılmış şirkətdəki payının 22,5%-ni rüşvət olaraq Ermənistanın ikinci prezidenti Robert Köçəryanın qohumu və oğlu tərəfindən təsis edilmiş şirkətə verməsini tələb edib.
Sarqsyanın tələblərini yerinə yetirərək, M.B. 14 mart 2008-ci ildə öz payının göstərilən hissəsini yuxarıda göstərilən şəxslərin şirkətinə formal əqd üzrə satıb, həmçinin yeni yaradılmış şirkətə investisiya qoyub. 2013-cü ildə yuxarıda göstərilən yeni yaradılmış şirkətin iflası səbəbindən xarici investisiya təşkilatları öz səhmlərini satmaq niyyətində olublar. Bununla əlaqədar olaraq Sarqsyan M.B.-yə yaxın dostuna məxsus olan, Ermənistan Respublikasında fəaliyyət göstərən bank təşkilatına 14 milyon dollar məbləğində kredit almaq və iki Rusiya şirkəti tərəfindən həyata keçirilmiş investisiyaları geri qaytarmaq üçün müraciət etməyi tapşırıb, sonuncu da bunu edib. Bundan sonra o və M.B. sonuncunun təşkilatlarının, o cümlədən yeni yaradılmış şirkətin aktivlərinin satışına başlayıblar.
Eyni zamanda, Sarqsyan yuxarıda göstərilən əqddən qızının ərinin və onunla əlaqəli sahibkarlıq fəaliyyəti ilə məşğul olan təşkilatların fəaliyyətini təşviq etmək üçün istifadə etməyi qərara alıb. Nəticədə M.B. yeni bir şirkət yaradıb və digər şirkətlərin aktivləri bu şirkətə ötürülüb. 22 avqust 2015-ci ildə Sarqsyanın kürəkəni ilə əlaqəli şirkət M.B. tərəfindən əsası qoyulmuş yeni şirkətin 100%-ni 40 milyon dollara alıb ki, bu da ona Ermənistana benzin idxalında inhisarçılıq əldə etmək imkanı verib.
Bundan sonra Sarqsyan M.B.-dən əvvəllər qohumunun və Köçəryanın oğlunun şirkətinə formal əqd üzrə rüşvət olaraq verilmiş 22,5% səhm müqabilində Koçaryanın oğluna 6 milyon dollar məbləğində xüsusilə iri məbləğdə pul verməsini tələb edib. Daha sonra M.B. sonuncunun təşəbbüsü ilə ona təqdim edilmiş saxta borc müqaviləsi əsasında göstərilən xüsusilə iri məbləği öz şirkətinə ötürüb.
İlkin istintaq zamanı Sarqsyana xüsusilə iri məbləğdə rüşvət almaqda və qanunla müəyyən edilmiş qadağanı pozmaqla qanunsuz sahibkarlıq fəaliyyətində iştirak etməkdə ittiham irəli sürülüb.
Cinayət işi üzrə ilkin istintaq başa çatıb, iş materialları ittiham aktı ilə Ermənistanın Antikorrupsiya Məhkəməsinə göndərilib.
Sonrakı hadisələr barədə daha çox məlumat almaq üçün ain.az saytını izləyin.
